تاجىكستاندا الىپ قاۋىن تۇرىندەگى شايحانا اشىلدى
گيسساردىڭ 3000 جىلدىعىن مەرەكەلەۋگە ورايلاستىرىلعان راسىمگە تاجىكستان پرەزيدەنتى ەمومالي راحموننىڭ ءوزى كەلدى.
مەملەكەت باسشىسىنىڭ رەسمي سايتىنان حابارلانىپ وتىرعانداي، «قالا قۇرىلىسىنىڭ كونە داستۇرلەرى ساقتالىپ» سالىنعان جاڭا شاي ءۇيىنىڭ بيىكتىگى 43 مەتردى، ەنى - 55 مەتردى قۇرايدى، ال ۇزىندىعى 100 مەتردەن اسادى.
ماڭىزدى مەملەكەتتىك داتالار دۇركىرەپ وتكىزىلەتىن تاجىكستاندا سوڭعى جىلدارى كوپتەگەن جاڭا مەرەكەلەر پايدا بولدى. بۇل ەل قاۋىن مەن قاربىز كۇنىن، بال، پالاۋ جانە اسقاباق مەرەكەسىن اتاپ وتەدى، ءونىم جيناۋ جانە قىستى شىعارىپ سالۋ سياقتى كونە مەرەكەلەر قايتا ورالدى.
2009-جىلى تاجىكستاندا ۇزىندىعى 1501 مەتر، ەنى 7 مەتر بولعان تۋ تىگىلدى. ءبىر جارىم شاقىرىمدىق ماتانىڭ سالماعى 1,25 تونناعا جەتكەن.
ال 2011-جىلى ەل تاۋەلسىزدىگىنىڭ 20 جىلدىعىنىڭ قۇرمەتىنە دۋشانبەدە سول كەزدە الەمدە ەڭ بيىك بولعان تۋتۇعىر ورناتىلدى.
قازىرگى كەزدە دۋشانبەدە ورتالىق ازيادا ەڭ ۇلكەن بولاتىن جاڭا مەشىتتىڭ قۇرىلىسى قارقىندى ءجۇرىپ جاتىر. مەشىتتىڭ اۋماعى تاجىكستان كارتاسىنىڭ ءپىشىنى ۇلگىسىندە قۇرىلادى، دەپ جازادى شەتەلدىك ب ا ق.
