جاپونيا پرەمەر- مينيسترىنە نازاربايەۆ ۋنيۆەرسيتەتىنىڭ قۇرمەتتى دوكتورى اتاعى بەرىلدى

استانا. قازاقپارات - كەشە ەلباسى نۇرسۇلتان نازاربايەۆ جاپونيا پرەمەر- ءمينيسترى سيندزو ابەمەن بىرگە نازاربايەۆ ۋنيۆەرسيتەتىنە باردى، دەپ حابارلايدى اقوردانىڭ باسپا ءسوز قىزمەتى.

قازاقستان پرەزيدەنتى مەن جاپونيا پرەمەر- ءمينيسترى وقۋ كورپۋستارىن ارالاپ كوردى جانە ۋنيۆەرسيتەتتى دامىتۋ پەرسپەكتيۆالارىمەن تانىستى.

س. ابە قۇرمەتتى قوناقتار كىتابىنا قولتاڭبا قالدىرىپ، ۋنيۆەرسيتەت وقىتۋشىلارى مەن ستۋدەنتتەرى الدىندا ءدارىس وقىدى. ول ءوز سوزىندە قازاقستان ونەركاسىبىن جاڭعىرتۋ ۇدەرىسىندە كادر دايارلاۋدىڭ ماڭىزدىلىعىن جانە بۇل ىسكە جاپونيا بەلسەنە اتسالىسۋعا ءازىر ەكەنىن ايتتى.

- ءبىز ءسىزدىڭ ەلدىڭ ونەركاسىبى ءۇشىن جوعارى بىلىكتى ماماندار دايارلاۋ ىسىنە الداعى ۋاقىتتا دا قولداۋ كورسەتۋگە نيەتتىمىز، - دەدى سيندزو ابە.

 ءدارىس سوڭىندا جاپونيا پرەمەر- مينيسترىنە نازاربايەۆ ۋنيۆەرسيتەتىنىڭ قۇرمەتتى دوكتورى اتاعى بەرىلدى.