عارىشكەر ا. ايىمبەتوۆ سەنىمدى تولىق اقتاي الدى - تالعات مۇسابايەۆ

استانا. قازاقپارات - ايدىن ايىمبەتوۆ جوعارى بىلىكتى بورتينجەنەر رەتىندە ۇشقانىنا ماقتانامىن. بۇگىن بۇل تۋرالى استانادا ق ر ينۆەستيتسيالار جانە دامۋ مينيسترلىگى اەروعارىش كوميتەتىنىڭ ءتوراعاسى تالعات مۇسابايەۆ ءمالىم ەتتى.

«ايدىن عارىش ساپارىنىڭ تەك قاتىسۋشى رەتىندە ەمەس، ول جوعارى بىلىكتى عارىشكەر قىزمەتىندە ۇشتى. ول بورتينجەنەر مارتەبەسىنە يە بولدى، ياعني بۇل ماڭىزدى قىزمەت بولىپ تابىلادى. اتاپ ايتقاندا، بۇل قىزمەت ايدىن ايىمبەتوۆ كاسىبي عارىشكەر ەكەنىن راستايدى. عارىش كەمەسىندە تەك ءۇش ورىن عانا بولادى. وندا كەمە كومانديرى باستى مامان رەتىندە تاعايىندالادى، سونىمەن قاتار كەمەدە بورتينجەنەر بولادى. تاجىريبەلىك تۇرعىدا وسى ەكى قىزمەتتەگى مامانداردىڭ بىلىمدەرى تەڭ بولادى»، - دەدى اەروعارىش كوميتەتىنىڭ ءتوراعاسى عارىشتا بولىپ كەلگەن «ەكسپو-2017» جالاۋىن تابىستاۋ راسىمىندە.

سونىمەن قاتار، ت. مۇسابايەۆ كەمەدەگى ءۇشىنشى ادام شاعىن باعدارلامانى ىسكە اسىرۋعا ارنالعان زەرتتەۋشى رەتىندە باراتىنىن جەتكىزدى. «مەن ءبىزدىڭ ايدىن عارىش ساپارىنىڭ تەك قاتىسۋشىسى رەتىندە عانا ەمەس، ياعني كاسىبي عارىشكەر رەتىندە ۇشقانىنا ماقتانامىن. وسى باعىتتا مەنىڭ جۇمساعان كۇش- جىگەرىمدى ايدىن ايىمبەتوۆ تولىق اقتاي الدى. ول وتە قىسقا مەرزىمدە دايىندىقتان ءوتتى. بۇندايدى كەز كەلگەن عارىشكەر ەڭسەرە المايدى. سونىمەن قاتار ايدىن قازاقستاننىڭ عىلىمي باعدارلاماسىن دا ويداعىداي ورىنداپ شىقتى»، - دەدى ول.

بۇدان بۇرىن حابارلانعانداي، بۇگىن استانادا قازاقستاننىڭ ءۇشىنشى عارىشكەرى ايدىن ايىمبەتوۆ «استانا ەكسپو-2017» ۇلتتىق كومپانياسى» ا ق باسقارما ءتوراعاسى احمەتجان ەسىموۆكە عارىشتا بولىپ كەلگەن «ەكسپو-2017» جالاۋىن تابىستادى.

اۆتور: رۋسلان عابباسوۆ