روزا رىمبايەۆا: مەن وتە اشكوز ءانشىمىن
روزا رىمبايەۆانىڭ ونەردە جۇرگەنىنە 40 جىلدان اسسا دا، ول كۇن سايىن ءوزىن، داۋىسىن جانە رەپەرتۋارىن جەتىلدىرىپ وتىرادى. سەبەبى ءانشى ساحناعا شىعار الدىندا ءار ۋاقىتتا اسا ىجداھاتتىلىقپەن دايىندالادى. ءارتىس ءۇشىن ساحنا - كيەلى ورىن.
«ەلىمىزدىڭ قاي تۇكپىرىندە بولماسىن، كىمنىڭ الدىندا بولماسىن ونەر كورسەتكەندە وعان ۇلكەن جاۋاپكەرشىلىكپەن قارايمىن، وزىمە تالاپ قويامىن. ويتكەنى، كورەرمەن مەنىڭ ونەرىمدى تاماشالاۋعا رىمبايەۆا ءبىرىنشى ءنومىرلى ءانشى دەگەن سەنىممەن كەلەدى، ال مەن سول سەنىمدى اقتاۋىم كەرەك»، - دەيدى روزا.
حالىقتىڭ جادىندا قالىپتاسقان وسىنداي پىكىرگە قاراماستان، روزا كەي كەزدەرى بابىمدا بولماي قالاتىنىن دا ايتا كەتتى.
كەيدە شارشايمىن، سىرقاتتانىپ دۇرىستاپ ءان ايتا الماي قالاتىن كەزدەرىم دە بولادى
«كەيدە شارشايمىن، سىرقاتتانىپ دۇرىستاپ ءان ايتا الماي قالاتىن كەزدەرىم دە بولادى. دەگەنمەن، مۇنداي كەلەڭسىزدىكتى مۇلدە بولدىرماۋىم قاجەت، سوندىقتان، بارلىق ۋاقىتتا جانىمدى سالىپ، تىڭدارمانىمنىڭ كوڭىلىندەگىدەي ونەر كورسەتۋگە تىرىسامىن»، - دەيدى رىمبايەۆا.
ءانشىنىڭ ايتۋىنشا، 40 جىلدىق مەرەيتويدا جاس انشىلەر روزانىڭ عانا اندەرىن ورىندايدى.
«مەن وتە اشكوز ءانشىمىن. ەكى ءبولىمنىڭ بارلىعىندا ءوزىم ءان ايتقىم كەلەدى جانە اندەرىمدى تەك ءوزىم عانا ورىندايمىن. شىعارماشىلىق ۇجىم باعدارلاماعا جاس انشىلەردى ارالاستىرعىسى كەلگەندە، مەن ولارعا تەك مەنىڭ اندەرىمدى عانا ورىندايتىندارىن ايتتىم»، - دەپ قىسقا قايىردى رىمبايەۆا.
الداعى كونسەرتتىڭ باستى ەرەكشەلىگى دە وسىندا ەكەن. كورەرمەندەر روزانىڭ ونەرىن تاماشالاپ قانا قويماي، جاس انشىلەردىڭ 30-40 جىل بۇرىنعى اندەردى قالاي ورىندايتىنىنا كۋا بولادى.
«بۇل تۋىندىلاردى ناعىز مايتالمان كومپوزيتورلار جازعان، سوندىقتان بۇل اندەر بۇگىنگە دەيىن ورىندالىپ، تىڭدارماننىڭ قۇلاق قۇرىشىن قاندىرىپ كەلەدى. بۇل كومپوزيتورلار بۇگىنگى جاس مامانداردان اسپاسا، كەم تۇسپەيدى»، - دەيدى حالىق ءارتىسى.
