شىمكەنتتە پالاۋ فەستيۆالىنىڭ جەڭىمپازى تاعامدى مەككەنىڭ قاسيەتتى سۋىنان ازىرلەگەن - فوتو
فەستيۆالدى ۇيىمداستىرۋشىلار - وڭتۇستىك قازاقستاندىق وزبەك مادەني ورتالىعى. وعان قاتىسۋشىلار تەك قانا و ق و- دان عانا ەمەس، تاشكەنتتەن دە اعىلادى.
ايتۋلى بايقاۋعا جاس ەرەكشەلىگىنە شەكتەۋ قويىلماعان اسپازدار قاتىسىپ، وزبەك حالقىنىڭ ۇلتتىق تاعامىنىڭ ناق نۇسقاسىن ازىرلەپ كوپكە ۇسىنۋعا تىرىستى دەپ جازادى kz.otyrar.kz.
سايىس جەڭىمپازدارى kz.otyrar.kz سايتىنىڭ تىلشىسىمەن اس ءمازىرىنىڭ قۇپياسىمەن ءبولىستى.
قازان مەن وشاق - پالاۋ فەستۆالىنىڭ ءسانى، ءداستۇرى. ادەتتەگىدەي كۇرىشى سالىنىپ، تۇزدىعى تۇگەندەلدى. بۋى بۇرقىراپ، قازاندار قاينادى. ءدال وسىلاي «دوستىق داستارحانىنا» قاتىسقان ءار ۇمىتكەر وزبەك ۇلتىنىڭ ۇلتتىق تاعامى - پالاۋدىڭ ناق نۇسقاسىن جاساۋعا اسىقتى.
پالاۋ دەپ ءبىر سوزبەن ايتىلعانىمەن، اسپازدار وزدەرىنىڭ تاماقتارىنا ەرەكشە ات قويىپ ۇلگەرگەن. ماحمۇدجان وماروۆ «ماحاببات» پالاۋىنىڭ دايىندالۋ ءمازىر- قۇپياسىمەن ءبولىستى.
سايىسقا 26 اسپاز قاتىستى. ماحمۇدجان وماروۆ پالاۋدى ماحابباتپەن ءپىسىرۋ قاجەت دەپ ەسەپتەيدى.
«بۇل پالاۋعا ورتا ەسەپپەن 4 كەلى كۇرىشكە 4 كەلى ەت كەرەك جانە وعان 1 ليتر ماي قوسىپ جاتىرمىن. ەڭ الدىمەن ەتتى جاقسىلاپ قۋىرىپ، ودان سوڭ پياز سالامىز. ءسابىزدىڭ ءسولى شىققانشا ونى دا قۋىرىپ، سۋ قۇيامىز، نوقات پەن ءميىزدى سۋ قايناعاندا سالىپ، بۋعا بۇقتىرامىز. ەت پىسكەندە كۇرىشتى سالىپ، پىسىرەمىز. مازىردەگى قۇپيام وسى. پالاۋدى اركىم قالاعانىنشا دايىندايدى. مەنىڭ ويىمشا تاماقتى تەك ماحابباتپەن ازىرلەگەندە عانا ءدامدى بولادى. وسىنى ۇمىتپاعانىمىز دۇرىس»، - دەيدى اسپاز ماحمۇدجان وماروۆ.
«قوسپالاردىڭ بارلىعى بىردەي بولعانىمەن، پالاۋدىڭ دامدەرى قايتالانبايدى» دەيدى اسپازدار.
ايتپاقشى ۇلتتىق تاعام ءۇشىن سارىمساقتىڭ ورنى ەرەكشە.
پالاۋ ازىرلەگەندە ونىڭ ءسابىزى، ەتى مەن كۇرىشىن ارالاستىرۋعا بولمايدى. بۇل - تاعامنىڭ باستى شارتى.
ۇلتتىق تاعامدى ناسيحاتتاۋ سايىسى بيىل 5-رەت ۇيىمداستىرىلدى. مۇندا «العاشقى ماحاببات» پالاۋىنان بولەك سارى ءتۇستى «التىن تاعام»، «توي پالاۋى» سىندى ءتۇرلى اتپەن 26 بىردەي قازان اسىلدى. ونىڭ ىشىندە «تاشكەنت پالاۋىن» مەكتەپ وقۋشىلارى، جاسى نەبارى 12 گە تولعان جاس اسپازدار دايىندادى.
وسى كەزدە تاعامى پىسكەندەرى پالاۋدى بەزەندىرۋگە كىرىستى. قايناعان جۇمىرتقا، مەيىز بەن انار داندەرى اسقا كورىك بەرسە، سارىمساق ءتىل ۇيىرەر ءدامىن كىرگىزدى. ال مەيماندار تاعامعا باعاسىن بەرۋدى ۇمىتقان جوق.
سايىستىڭ ەڭ جاس قاتىسۋشىلارى. 12-14 جاسار اسپازدار «تاشكەنت پالاۋىن» ازىرلەدى.
بايقاۋدىڭ تالابى - استى ءدامدى ازىرلەۋ عانا ەمەس، ونى ساندەپ- بەزەندىرۋ
سونىمەن، پالاۋ پىسىرۋدە اسپاز گۋلامجان عانيەۆكە تەڭ كەلەر جان بولمادى. جەڭىمپازعا 30 مىڭ تەڭگەنىڭ سىي-تارتۋى تابىستالدى. شىمكەنت قالالىق ءماسليحاتىنىڭ دەپۋتاتى سانالاتىن عانيەۆ جەڭىسكە جەتۋىنىڭ قۇپياسىمەن ءبولىستى.
ول دوستارى مەككەدەگى قاجىلىقتان اكەلگەن قاسيەتتى سۋدى پالاۋعا قوسقان ەكەن.
جۇلدەلى ەكىنشى ورىندى ازادا تەشەبايەۆا پەن شاكىر زايدوۆ ءوزارا ءبولىستى. ال جۇلدەلى ءۇشىنشى ورىندى ناسيبۋللا حاليلوۆ پەن داۋلەت ميرراحيموۆ جانە ۇلىقبەك حالمەتوۆ قاناعات تۇتتى. قازىلار القاسى ەڭ جاس اسپاز بەكجان اكراموۆتىڭ اس ءمازىرىن دە ايرىقشا اتاپ ءوتتى.
