جاپونيا پرەمەر- ءمينيسترىنىڭ زايىبى: قازاقتىڭ كيىز ءۇيى مەنى قاتتى قىزىقتىردى
تاڭەرتەڭ اكيە ابە استاناداعى وقۋشىلار سارايىندا بالالاردىڭ ونەرىن تاماشالاپ، جاس جۋرناليستەرمەن كەزدەسكەنىن حابارلاعان ەدىك.
ۇلتتىق مۋزەي ديرەكتورى دارحان مىڭباي شەتەلدىك قوناققا مۋزەيدىڭ ەكى زالىن، اتاپ ايتساق، «التىن» زالى مەن ەتنوگرافيا زالىن ارالاتىپ كورسەتتى. ءوز كەزەگىندە اكيە ابە حانىم تاريحى باي، ەرەكشە سالت- ءداستۇرى بار قازاق حالقىنىڭ تۇرمىس-تىرشىلىگىمەن، التىن ادامنىڭ تاريحىمەن تانىسقانىنا قۋانىشتى ەكەنىن جەتكىزدى.
«ۇلتتىق مۋزەي عيماراتىنىڭ ءوزى وتە ەرەكشە ادەمى سالىنعان ەكەن. مەنى اسەرگە قالدىرعان جايت - قازاقستاندا تۇراتىن كوپ ۇلتتار ءبىر شاڭىراققا جينالعان ەكەن. بۇل وتە جاقسى. جاپون حالقى مەن قازاق حالقىنىڭ سالت-ءداستۇرى ەكى بولەك الەم، ياعني، ايىرماشىلىعى كوپ. سوندىقتان، قازاق حالقىنىڭ سالت- داستۇرىمەن تانىسۋ، كيىز ۇيىنە كىرىپ كورۋ ( ۇلتتىق مۋزەيدىڭ ەتنوگرافيا زالىنداعى كيىز ءۇي) مەن ءۇشىن تاڭسىق ءارى قىزىق بولدى. تەك ءبىر ۇقساستىق- قازاق حالقى سياقتى ءبىز دە وتباسىمىزبەن تۇگەلدەي ءبىر داستارقانعا جينالىپ، جەرگە وتىرىپ تاماق ىشەمىز. مەن مۋزەيگە تاعى كەلىپ كورگىم كەلەدى»، - دەدى مۋزەيدەگى ەكسكۋرسيا اياقتالعاننان كەيىن اكيە حانىم.
سونداي-اق جاپونيا پرەمەر-ءمينيسترىنىڭ زايىبى ۇلتتىق مۋزەيدىڭ سىيلىعىن قابىلداي وتىرىپ، مۋزەيدىڭ سىيلى قوناقتارى كىتابىنا تىلەگى مەن قولتاڭباسىن جازىپ قالدىردى.
اۆتور: كەنجەكەي توقتامۇرات قىزى
