ءجۇز جىلدا اشىلعان العاشقى مەشىت - فوتو
الەكساندروۆكا اۋىلىنداعى « ءشاپي» اتىنداعى جاڭا مەشىتتى سالۋعا مۇرىندىق بولعان كاسىپكەرلەر - اربيەۆتەر اۋلەتى.
كۇزدىڭ سوڭعى شىڭىلتىر ايازدى كۇنى بولسا دا جاڭا مەشىتتىڭ اشىلۋىنا اۋىل حالقى تەگىس جينالدى. مەشىتتىڭ اشىلۋ راسىمىنە ق م د ب- نىڭ ءتوراعاسى، باس ءمۇفتي ەرجان قاجى مالعاجى ۇلى، وبلىس اكىمى قانات بوزىمبايەۆ، ق م د ب- نىڭ ءىس باسقارۋشىسى ەربوسىن ورىن، وبلىستىڭ وكىل يمامى ناريمان يسەنوۆ، الماتى قالاسىنىڭ وكىل يمامى نۇربەك ەسماعانبەت، اۋدان اكىمى ب. ىبىرايەۆ جانە پاۆلودار وبلىسىنا قاراستى قالا، اۋدان يمامدارى دا تۇگەلدەي قاتىستى.
مەشىتتىڭ اشىلۋ سالتاناتىندا ءسوز العان باس ءمۇفتي ەرجان قاجى مالعاجى ۇلى: «جاڭادان سوعىلىپ، پايدالانۋعا بەرىلگەن مەشىتتە نامازعا كەلۋشىلەردىڭ قاتارى كوبەيىپ، اسقاق ءدىنىمىز يسلامنىڭ مارتەبەسى وسە بەرسىن! مەشىت سالۋ - اللانىڭ تاراپىنان بەرىلگەن ۇلكەن سىي. پايعامبارىمىز (وعان اللانىڭ يگىلىگى مەن سالەمى بولسىن) اللا ءۇيىن تۇرعىزعان ادام ءۇشىن ءجانناتتا ساراي سالىناتىنىن وسيەت ەتىپ، سۇيىنشىلەگەن. ەندەشە، جاڭا مەشىت يماندىلىقتىڭ تەمىرقازىعىنا اينالسىن!» ، - دەپ تىلەك ءبىلدىرىپ، جاڭا مەشىتتىڭ جاڭا يمامى «نۇر مۇباراك» ۋنيۆەرسيتەتىنىڭ تۇلەگى قالامحانتەگى سەرىك امانگەلدى ۇلىنا قاسيەتتى قۇران كىتابى مەن وسى مەشىتكە يمام ەتىپ تاعايىندالعان بۇيرىعىن تابىس ەتتى.
وبلىس اكىمى قانات بوزىمبايەۆ: «جاڭادان اشىلعان قۇلشىلىق ءۇيى ىنتىماق پەن رۋحاني دوستىققا شاقىراتىن ورىنعا، يماندىلىق جولىنداعى رۋحاني ءبىلىم وشاعىنا اينالۋىنا تىلەكشىمىز. تاۋەلسىزدىك العان جىلدارى پاۆلودار وبلىسىندا 4 قانا مەشىت بولسا، قازىرگى تاڭدا ولاردىڭ سانى 100 گە جاقىنداپ قالدى. بۇل ايماقتاعى الەۋمەتتىك- ەكونوميكالىق دامۋىمەن قاتار رۋحاني قۇندىلىقتارىمىزدىڭ دا جاندانعانىن بىلدىرسە كەرەك. «تالاپ - پەندەدەن، قولداۋ - تاڭىردەن» دەيدى دانا حالقىمىز. تالاپتى ازاماتتارىمىزدىڭ ىزگى ىستەرى وڭعا باسىپ، قۇلشىلىق ەتكەن ءاربىر ادامنىڭ ىستىق- ىقىلاسى اللادان قولداۋ تاپسىن!» ، - دەپ، حالىقتى كوپتەن كۇتكەن قۋانىشىمەن قۇتتىقتادى.
كەلەسى كەزەكتە اۋداننىڭ قۇرمەتتى ازاماتى قۇسايىن بۋكايەۆ، مەشىتتىڭ باس دەمەۋشىسى ەلتاي اربيەۆ سىندى ەل اعالارى دا ءسوز الىپ جاڭا مەشىتتىڭ اشىلۋىمەن اۋىل حالقىنا جىلى لەبىزدەرىن ءبىلدىردى.
جاڭا اشىلعان مۇسىلماندىق ورداسىندا جاماعات باس ءمۇفتيدىڭ يمامدىق ەتۋىمەن ەكى راكات ءناپىل ناماز وقىپ، ارنايى استان ءدام تاتىپ تارقاستى.
امانتاي تويشىباي ۇلى، ء«ماشھۇر ءجۇسىپ» مەشىتىنىڭ باسپا ءسوز قىزمەتى
