حالىق بىزدەن «ايەل وسەك» ەمەس، ابدەن زەرتتەلگەن شىندىق كۇتىپ وتىر

استانا. قازاقپارات - تارازداعى ورتكە ورانعان جىگىتتىڭ جانتۇرشىگەرلىك وقيعاسى بىزدەگى جۋرناليستيكانىڭ دا دەڭگەيىنىڭ قانداي ەكەنىن كورسەتىپ بەرگەن سياقتى.

«ءويتىپتى، ءبۇيتىپتى» دەگەن قاڭقۋ سوزدەردى جاريالاۋعا عانا شامامىز جەتتى. بەيشارا بالانىڭ دەنەسى جەرگە بەرىلمەي جاتىپ ءبىراز اڭگىمە ايتىپ تاستادىق.

باس پروكۋراتۋرانىڭ، «نۇر وتاننىڭ» ءوزىن - وزدەرى اقتاۋلارىنا بالاما جۋرناليستىك زەرتتەۋ نەگە جوق؟ وزدەرىن اشىق ويدىڭ مىنبەرى سانايتىن ەلگە بەلگىلى سايتتاردىڭ ءوزى الەۋمەتتىك جەلىدەگى ۇيدە وتىرعان ايەلدەردىڭ جازعانىنان ارتىق بىردەڭە جازدى دەپ ايتا المايمىن.

ورىمدەي بالانىڭ ورتەنىپ ءولۋى - ۇلكەن تراگەديا! سول بالانى سوعان يتەرمەلەگەن نە؟ رەسمي ورگاندار ايتقانداي شىنىمەن قىلمىسكەر بولسا مۇنداي قادامعا بارۋى مۇمكىن ەمەس قوي؟ جۇرمەي مە قاشىپ، پىسىپ... الگى «وپەر» كىم؟ ەگەر بۇل بالا بىرەۋدى پىشاقتاعان، قالتاعا تۇسكەن بولسا - الاڭدا نەعىپ ءجۇر؟

سۇراي بەرسەك، ساۋال كوپ! جاۋاپ جوق! جۋرناليستىك زەرتتەۋ وسىندايدا كەرەك. كەشەگى جانبولات اۋپباي، قاينار ولجايلاردىڭ زەرتتەۋلەرى نەگە بۇگىن جوق؟ سەبەبى ءبارىمىز جىلى بولمەدە، كومپيۋتەر الدىندا وتىرىپ-اق ءدۇدامال اقپاراتتارمەن وقىرماندى الداۋدى ۇيرەندىك.

ودان قالعان شارۋانى ءانشى، اسابالارعا وتكىزىپ بەرىپ قويدىق. ال، حالىق بىزدەن «ايەل وسەك» ەمەس، ابدەن زەرتتەلگەن شىندىق كۇتىپ وتىر. وعان بيلىك مۇمكىندىك بەرمەيدى دەگەن ءسوزدى ايتپاي-اق قويالىق. ناقتى دالەلدەرمەن جازىلعان سول زەرتتەۋ-بيلىككە دە كەرەك!

ارمان سقابىل ۇلى

Facebook-تەگى پاراقشاسىنان