مۇحتار شەرىم: و، ماحاببات

استانا. قازاقپارات - «اباي جولىمەن» كەلە جاتقانمىن. عابيت مۇسىرەپوۆتىڭ «ۇلپانىن» كەزدەستىرىپ قالدىم.

بۇرىننان تانيمىن عوي، ءجون سۇراسام، ەپوستىق جىرداعى- «بايان سۇلۋ» ساۋدا ورتالىعىندا مۇحتار ماعاۋيننىڭ «الاساپىرانى» (مەنەدجەر دەگەنىم عوي...) بولىپ جۇمىس ىستەپ جاتىر ەكەن.

وزىمشە «دۆيجەنيە» جاساعىم كەلىپ كەتتى. ءسابيت مۇقانوۆتىڭ «ءمولدىر ماحابباتىن» باسىمنان وتكەرىپ تۇرمىن. باياعىدا تىنىمباي نۇرماعانبەتوۆتىڭ «اتا قونىسىنا» بارعانىمدا، ءبىر رەت كورگەنمىن. بويجەتىپ قالىپتى. جۇسىپبەك ايماۋىتوۆتىڭ «اق بىلەگىندەي» ەكەن بىلەگى...

سپانديار كوبەيەۆتىڭ «قالىڭ مالىن» تولەپ، ۇيلەنىپ السام با ەكەن؟ ءاي، ءبىراق قۋ كەدەيشىلىك-اي، بەيىمبەت مايليننىڭ «سەكسەن سومى» جەتپەيدى عوي. مەيلى، ماعجاننىڭ «باتىر بايانى» سياقتى ءولىپ كەتسەم دە شىرەنىپ تۇرۋىم كەرەك قوي.

ولگەنى قۇرىسىن، بەردىبەك سوقپاقبايەۆ جازىپ كەتكەن: «ولگەندەر قايتىپ كەلمەيدى»... شىنىمدى ايتسام، ءابدىجامىل نۇرپەيسوۆتىڭ «قان مەن تەرىندەي» بولىپ تۇرمىن. قىز دا ۇندەمەيدى.

تۇتقاباي يمانبەكوۆتىڭ «تۇت اعاشىنىڭ كولەڭكەسىندە» ءالى تۇرمىز. بۇل قىز ماعان مۇقاعالي ماقاتايەۆتىڭ «ارمانى» سياقتى ما؟ جوق الدە، شىڭعىس ايتماتوۆتىڭ «جان پيداسى» بولىپ، الىپ قاشسام با؟ سوتتالىپ كەتەمىن-اۋ! رىمعالي نۇرعاليدىڭ «اياقتالماعان تراگەدياسى» بولىپ جۇرسەم شە؟ نە دەپ كەتتىم؟ ساكەن يماناسوۆ سياقتى «ايتار ەدىم»، ءبىراق ءتىلىم كۇرمەلىپ...

- كەشىرىڭىز، تەودور درايزەردىڭ «اياۋلى كەرريىنە» ۇقسايدى ەكەنسىز...- دەدىم مەن.

-  اعاي، حاللدور لاكسنەسستىڭ «ارمانىن اڭساعان جاندار» كۇيىن كەشكەن جالعىز ءسىز ەمەس...-  دەدى بويجەتكەن.

- كەشىرىڭىز، ءازىلحان نۇرشايىقوۆتىڭ «ماحاببات قىزىق، مول جىلدارىن» باستاساق قايتەدى؟ - دەپ ازىلدەدىم مەن.

- مۇستافيننىڭ «ميلليونەرى» بولساڭىز، كورەمىز...

- حاميت ەرعاليەۆشە «ءبىزدىڭ اۋىلدىڭ قىزى» ەكەن دەپ ويلاپ تۇرسام... اقشانى عانا ويلايدى ەكەنسىز، بەككوجيننىڭ «ماريام جاگور قىزىنان» ۇلگى الساڭىز ەدى!

- اعاي دەيمىن، ءازىلدى كوتەرە المايسىز با، ءجۇدا تاحاۋي اقتانوۆتىڭ «قاھارلى كۇندەرىنە» ۇقساپ باراسىز...

- ءىلياس ەسەنبەرليننىڭ «جانتالاسىنداي» جارماسىپ جاتقانىم عوي، قارىنداس...

-  نەمەنە، ساكەن ءجۇنىسوۆتىڭ «اقان سەرىسى» ءسىز بە؟

- بولسام شە؟ ءسىز دە يسابەكوۆتىڭ «اپكەسىنە» ۇقسايدى ەكەنسىز.

ايتپاقشى، قولىڭىز بوس پا؟ كافەگە بارىپ، روللان سەيسەنبايەۆتىڭ «تۇنگى ديالوگىن» باستاساق؟

- مۇراتبەكوۆتىڭ «اي تۋار الدىندا» ما؟

- ءيا. عابيت مۇسىرەپوۆتىڭ «كەزەسپەي كەتكەن ءبىر بەينەسىندەي» اح ۇرىپ قالمايىن...

- جارايدى... شەكسيپيردىڭ «كورل ليرىندەي» قويمادىڭىز عوي.

و، «ءمولدىر ماحاببات!» «و، ماحاببات قىزىق مول جىلدار! ماقاتايەۆتىڭ «اققۋلارى ۇيىقتاعاندا» «ۇلپاننىڭ» قىپشا بەلىنەن قاپسىرا قۇشاقتاپ، قالي سارسەنبايدىڭ «تۇلعا -  تاعدىرىنداي» بولماسام دا، كەۋدەمدى كەرە ۇستاپ، «ويانعان ولكە» -  شىمقالانىڭ شىرايلى كوشەلەرىندە «الماس قىلىشتاي» جارقىراپ كەلە جاتتىم... و، ماحاببات!

massaget.kz