اناممەن بىرگە دۋەت بولىپ ءان شىرقاعىم كەلمەيدى - ءالي وقاپوۆ
«ەرتەڭىمە سەنەمىن» اتتى مەرەيتويلىق كونسەرتى قارساڭىندا وتكەن باسپا ءسوز ءماسليحاتى بارىسىندا مەرەيتوي يەسىنىڭ ۇلى، جاس ءانشى ءالي وقاپوۆ وسىلاي دەدى.
ونىڭ ايتۋىنشا، اناسى كىممەن بولسا دا دۋەت بولىپ ءان سالعاندا ارقالانىپ كەتەتىنى سونشالىق، قاسىنداعى وپپونەنتىن «جەپ» قوياتىنداي اسەر قالدىرادى.
«راسىندا سولاي. اناممەن بىرگە دۋەت بولىپ ءان سالۋ وڭاي ەمەس. بۇل - ۇلكەن جاۋاپكەرشىلىك. انام انگە سونشاما بەرىلىپ، ارقالانىپ، اسقاقتاتىپ شىرقاعاندا العا ءتۇسىپ الىپ، ءاننىڭ تۋىن جالعىز ءوزى الىپ جۇرەتىندەي اسەر قالدىرادى. مۇنداي ساتتە ەڭ باستىسى - كەدەرگى جاساماي قولداۋ كورسەتۋ. بۇل، ارينە، شىعارماشىلىق ونەردىڭ ءبىر قىرى عوي. مۇندا مۋزىكالىق تەڭگەرىمدى، ۇيلەسىمدىلىكتى سەزىنۋ وتە ماڭىزدى. مەن ىرىكتەۋدەن ءوتىپ، اناممەن بىرگە دۋەت بولىپ ءان شىرقايتىنىما باقىتتىمىن»، - دەپ ەزۋ تارتتى ءالي وقاپوۆ.
سونىمەن قاتار، ول اناسىنىڭ تاربيە ىسىندە قاتال ەكەندىگىن جاسىرمادى.
«ءيا، جاسىراتىنى جوق، انام قاتال. ءمادي ەكەۋمىز ءتارتىبىمىز ءۇشىن، مۋزىكا ءۇشىن تالاي شاپالاق جەگەنبىز. ويتكەنى، انامىز شىعارماشىلىق جۇمىسىمىزعا سىن كوزبەن قاراپ، باعا بەرەردە بىزگە ۇلدارى رەتىندە ەمەس، تۇلعا رەتىندە قارايدى. جالعاندىقتى جانى سۇيمەيدى. ءبىزدى ونەرگە بارىنشا ادال بولۋعا، ءتارتىپتى بولۋعا باۋلىدى. انامنىڭ شىعارماشىلىق جولىنا، ەڭبەكقورلىعىنا، كونسەرتتەرىنە قاراپ، قالايشا ءوز ىسىڭە ادال بولمايسىڭ!؟ ارينە، بارلىق ءىسىڭدى اناڭ سەكىلدى ەڭ جوعارى دارەجەدە ءمىنسىز جاساۋعا كۇش سالاسىڭ»، - دەدى ءالي وقاپوۆ.
اۆتور: جاپپاربەرگەن ايبوتا
