الماتىدا روزا رىمبايەۆانىڭ مەرەيتويلىق كونسەرتى وتەدى - فوتو
وسىعان بايلانىستى بۇگىن روزا قۋانىش قىزى جۋرناليستەرمەن كەزدەسىپ، الداعى بولاتىن شىعارماشىلىق كەشى جايلى سىر ءبولىستى.
«مەنىڭ ساحنادا جۇرگەنىمە بيىل 40 جىل تولدى. ول كەزىندە وسى رەسپۋبليكا سارايىنان باستاۋ الىپ ەدى. سودان بەرى مىنە، اتتاي 40 جىل ءوتىپتى. بۇل از مەرزىم ەمەس. سوندىقتان، الداعى شىعارماشىلىق كەشىم - بۇل مەن ءۇشىن ەسەپ بەرۋ كونسەرتى. ارينە، قوبالجۋدامىن. ويتكەنى، بۇگىنگى كورەرمەننىڭ تالعامى، كوزقاراسى باسقاشالاۋ دەپ ويلايمىن. سوندىقتان، بۇل كونسەرتكە بارىنشا تىڭعىلىقتى دايىندالدىق. بۇل مەن ءۇشىن شىعارماشىلىق ەمتيحان ىسپەتتەس. حالقىما قانشالىقتى بابىمدا ەكەنىمدى جانە رەپەرتۋارىمدى كورسەتكىم كەلەدى. كورەرمەن كۇتكەن دەڭگەيدەن كورىنسەم دەيمىن»، - دەدى ر. رىمبايەۆا.
سونىمەن قاتار، روزا قۋانىش قىزى الداعى كونسەرتىنىڭ الماتى ق. اكىمىنىڭ ەسترادالىق- سيمفونيالىق وركەسترىنىڭ سۇيەمەلەدۋىمەن جۇرگىزىلەتىندىگىن ايتتى.
«سيرەك بولسا دا، مەنىڭ ەڭ ايتۋلى كونسەرتتەرىم وركەستردىڭ سۇيەمەلدەۋىمەن جۇزەگە اسىرىلادى. بۇل جولى دا مەن وركەستردىڭ كومەگىمەن ءوزىم جانە انشىلەرمەن بىرگە دۋەت بولىپ ءان شىرقايمىن. ماعان انشىلەر، وركەستر جانە مۋزىكانت ۇلدارىم - ءالي مەن ءمادي جان-جاقتى شىعارماشىلىق قولداۋ كورسەتىپ جاتىر. مەن بۇل جاعىنان باقىتتى جانمىن»، - دەدى ر. رىمبايەۆا.
ايتا كەتەلىك، كونسەرتكە ك س ر و حالىق ءارتىسى الىبەك دىنىشيەۆ، "استانا وپەرا" ءانشىسى سۇندەت بايعوجين، ەسترادا انشىلەرى - جۇبانىش جەكسەن ۇلى، رۇستەم نۇرجىگىت، ءمادينا سادۋاقاسوۆا، ءالي وقاپوۆ، ءمولدىر اۋەلبەكوۆا، ماقپال يسابەكوۆا، ءدىلناز احماديەۆا، الماس كىشكەنبايەۆ، نۇرجان كەرمەنبايەۆ، ينديرا ەدىلبايەۆا، The Jigits جانە ORDA توپتارى قاتىسادى.
سونداي-اق، مەرەيتويلىق كونسەرت قازىرگى كەزدەگى تەحنولوگيالار مەن زاماناۋي شوۋ سالاسىنداعى جاسالىمدارعا نەگىزدەلە وتىرىپ، ءانشىنىڭ مارتەبەسىنە ساي دايىندالعان. كونتسەرتتىك باعدارلامانى دايىنداۋعا قر مەن تمد ەلدەرىنىڭ ەڭ ۇزدىك ماماندارى شاقىرىلدى. شىعارماشىلىق كەش "live" فورماتىندا وتەدى. كونسەرت قورىتىندىسى بويىنشا جازىلىپ الىنعان دىبىستىق ماتەريالدار نەگىزىندە مەرەيتويلىق اۋديو جانە بەينە ديسكىلەر، بەينە كليپتەر شىعارىلادى.
ايتا كەتەلىك، 28-قازان - روزا رىمبايەۆانىڭ تۋعان كۇنى.
اۆتور: قانات مامەتقازى ۇلى
