بۇل - ءبىر عاجاپ وقيعا

استانا. قازاقپارات - سايد قاجىلىقتان كەيىن جيددا اۋەجايىنىڭ كۇتۋ زالىندا وتىرعان بولاتىن. وعان قاراما- قارسى تاعى ءبىر قاجى ورىن تەپكەن. ول سايدكە: «اللا تاعالا ماعان بۇل جىلى دا قاجىلىق باقىتىن سىيلادى، بۇل - مەنىڭ ونىنشى قاجىلىعىم» ، - دەدى.

 سايد ونى قاجىلىعىمەن قۇتتىقتاپ «اللا قاجىلىعىڭىزدى قابىل ەتسىن!» دەگەن تىلەك ايتتى. بەيتانىس قاجى دا سايدتەن بۇرىن قاجىلىققا كەلگەن، كەلمەگەنىن سۇرادى. سوندا سايد: «باۋىرىم، مەنىڭ قاجىلىق وقيعام وتە ۇزاق. ونى ايتىپ، ءسىزدىڭ باسىڭىزدى اۋىرتقىم كەلمەيدى» ، - دەپ جاۋاپ بەردى. كۇلىپ جىبەرگەن قاجى: «قۇداي ءۇشىن، ايتىپ بەرشى. بىزدە ءبارىبىر ۇشاقتىڭ ۇشۋىن كۇتكەننەن باسقا ىستەيتىن جۇمىس جوق قوي» ، - دەدى وتىنىشپەن. سايد تە جىميىپ اڭگىمەسىن باستاپ كەتتى: «مەنىڭ قاجىلىق وقيعام دا كۇتۋدەن باستالعان. قاجىلىقتى ۇزاق كۇتتىم. قاجىلىققا جەتەتىن قارجىنى جەكەمەنشىك اۋرۋحانادا باقانداي 30  جىل جۇمىس ىستەگەننەن كەيىن عانا جيناي الدىم. ءبىر كۇنى ماعان بىزدە ەمدەلەتىن سال اۋرۋىمەن اۋىراتىن بالانىڭ اناسى كەلىپ: «سايد بالام، اللانىڭ اماندىعىندا بول! بۇل ءبىزدىڭ سوڭعى كەلۋىمىز» ، - دەدى قايعىلى جۇزبەن. ونىڭ سوزىنە تاڭعالعانىممەن، مەنىڭ جۇمىسىما كوڭىلى تولماي، وزگە اۋرۋحاناعا كەتەتىن بولار دەپ ويلادىم. سويتكەنىمشە بولعان جوق، ويىمدى وقىپ قويعانداي ول: «سايد، اللا كۋا عوي، سەن بالاما اكەسىنەن دە جۇمساق قارادىڭ. ءۇمىتىمىز ۇزىلە باستاعاندا سەنىڭ ەمىڭ كومەك بولدى، بالامىزدىڭ بەتى بەرى قارادى» . سونى ايتىپ، ايەل كەتىپ قالدى. ءبىراق ءجۇزى وتە قايعىلى ەدى» . باعانادان ۇندەمەي تىڭداپ وتىرعان قاجى: « قىزىق ايەل ەكەن ءوزى» دەپ ءسوزىن ءبولدى.

سايد: «مەن دە باسىندا سولاي ويلادىم. سوسىن اۋرۋحانانىڭ ناۋقاستارمەن قىزمەت بولىمىنە بارىپ، جاعدايدى بىلسەم، ناۋقاستىڭ اكەسى جۇمىستان شىعىپ قالىپ، ەندى ەمدى تولەي المايدى ەكەن. كوڭىلىم ءتۇسىپ، اۋرۋحانا ديرەكتورىنا بارىپ، ناۋقاستى اۋرۋحانا ەسەبىنەن ەمدەسەك دەگەن ءوتىنىشىمدى ايتتىم. ول: «بۇل قايىرىمدىلىق قورى ەمەس، جەكەمەنشىك مەكەمە!» - دەپ بەتىمدى قايتارىپ تاستادى. ديرەكتوردىڭ كابينەتىنەن قايعىرىپ شىقتىم. ويىمنان جاڭاعى ايەل شىقپاي قويدى. ءبىر ساتكە مەڭ- زەڭ بوپ تۇرىپ قالدىم دا، باسىمدى كوتەرىپ، كوزىمدى كوككە قاداپ: «اللاھىم! مەنىڭ جۇرەگىمدەگىنى ءوزىڭ جاقسى بىلەسىڭ عوي. مەن ءۇشىن سەنىڭ ۇيىڭە قاجىلىققا بارۋدان، پايعامبار مەشىتىن كورۋدەن ارتىق سۇيىكتى نارسە جوق. مەن وعان ۇزاق جىلدار بويى دايىندالدىم. ءبىراق سول باقىتتان مىنا بايعۇس ايەل مەن ونىڭ بالاسىنىڭ باقىتىن ارتىق كورىپ تۇرمىن. مەنى ءوزىڭنىڭ يگىلىگىڭنەن اجىراتپا!» دەپ دۇعا ەتتىم دە، ۇزاق جىلدار جيناعان قارجىمدى بالانىڭ ەمىنىڭ 6 ايىنا تولەدىم. سوسىن ايەلگە حابارلاسىپ، مۇنداي جاعدايعا ارنالعان اۋرۋحانانىڭ بيۋدجەتى بارىن ايتتىم» .

 وسى ساتتە ەرەكشە اسەرلەنىپ كەتكەن قاجى:

- ساعان اللانىڭ بەرەكەتى بولسىن! ەگەر بۇكىل اقشاڭدى قايىرىمدىلىققا جۇمساپ جىبەرگەن بولساڭ، قاجىلىققا قالاي كەلدىڭ؟ » - دەپ سۇرادى. سايد:

 - مەن ۇيگە مۇڭايىپ ورالعانمەن، قايعىرعان انا مەن اۋرۋ بالاعا كومەكتەسە العانىم ءۇشىن جۇرەگىم قۋانىشقا تولى ەدى. سول ءتۇنى ۇيىقتاپ، ءتۇس كوردىم. تۇسىمدە قاعبانى اينالىپ، قاجىلىق جاساپ ءجۇر ەكەنمىن. ماڭايىمداعى ادامدار ماعان سالەم بەرىپ: «سايد! اللا تاعالا قاجىلىعىڭدى قابىل ەتسىن!» - دەپ تىلەپ جاتىر ەكەن. مەن سولاي جەردەگى قاجىلىقتان بۇرىن، كوكتە قاجىلىق جاسادىم. ۇيقىمنان قاتتى قۋانىپ وياندىم، ونىڭ وسى كەڭشىلىگىنە ماداق ايتتىم. سول ساتتە تەلەفون شىرىلداپ قويا بەردى. اۋرۋحانانىڭ ديرەكتورى ەكەن. ماعان: «ءسىزدىڭ كومەگىڭىز كەرەك. باس دارىگەر بيىل قاجىلىققا جينالىپ جاتىر. ءبىراق ول ارنايى جەكە دارىگەرىنسىز بارمايدى. ال بىرگە بارۋى ءتيىس دارىگەر ايەلىنىڭ ايى- كۇنى جەتىپ وتىرعانى سەبەپتى باس بارتىپتى. ءوتىنىشىمدى جەرگە تاستاماي، باس دارىگەرمەن بارىپ كەلەسىز دەپ ويلايمىن» ، - دەدى. كوزىمنەن جاس ىرشىپ ءتۇستى. اللاعا ماداق ايتىپ، شۇكىر ساجدەسىن جاسادىم! كورىپ وتىرعانىڭىزداي باۋىرىم، اللا تاعالا مەنى ەش شىعىنسىز قاجىلىققا الىپ كەلدى. باس دارىگەر وعان كورسەتكەن قىزمەتىم ءۇشىن بارلىق شىعىنداردى ءوزى كوتەردى. وعان ايەل مەن ونىڭ اۋرۋ بالاسى تۋرالى ايتىپ بەرىپ ەدىم، ول ناۋقاستى ءوز ەسەبىنەن ەمدەۋگە بۇيىرىپ، مەنىڭ اقشامدى قايتارتتى. سونىمەن قاتار اۋرۋحانادا جاعدايى جوق ناۋقاستاردى ەمدەۋگە ارنالعان قارجى جينالاتىن جاشىك پايدا بولدى. جاڭاعى جۇمىسىن جوعالتقان ايەلدىڭ كۇيەۋىن ءوزىنىڭ كوپ فيرمالارىنىڭ بىرىنە جۇمىسقا الدى. اللانىڭ مەيىرىمىنەن ارتىق مەيىرىم بار ما ەكەن؟ !

بۇل وقيعاعا قاتتى تەبىرەنگەن قاجى ورنىنان تۇرىپ، سايدتىڭ بەتىنەن ءسۇيدى دە:

- اللامەن انت ەتەمىن، ومىرىمدە  قازىر ۇيالعانداي ۇيالىپ كورمەپپىن. مەن ءار قاجىلىعىمدى وتەگەن سايىن كەرەمەت بىردەڭە جاساعانداي، اللانىڭ الدىندا دارەجەم ءوسىپ جاتقانداي سەزىنۋشى ەدىم. ءبىراق  قازىر سەنىڭ قاجىلىعىڭ مەنىڭ 100 قاجىلىعىما تەڭ كەلەتىنىن ءتۇسىنىپ وتىرمىن. ويتكەنى مەن اللانىڭ ۇيىنە ساپارعا ءوزىم شىقتىم، ال سەنى ۇيىنە اللا ءوزى شاقىردى، - دەدى دە: - اللا ءبىزدىڭ ءار ىزگى امالىمىزدى قابىل ەتسىن! بۇل اللامەن جاسالعان ەڭ كەرەمەت ساۋدا، - دەپ قايتالاي بەردى.. .

islam.kz