قازاقستان، يتاليا مەن قىتاي ەلدەرى بىرلەسىپ ساياحاتشى ماركو پولو تۋرالى دەرەكتى فيلم تۇسىرەدى

استانا. قازاقپارات - ⅩⅢ عاسىردا ءومىر سۇرگەن اتاقتى ساياحاتشى، كوشپەندىلەردىڭ تاريحىن زەرتتەپ، سونىڭ ىشىندە قازاقتىڭ سالت-ءداستۇرى تۋرالى تاماشا جازبالار قالدىرعان ماركو پولو تۋرالى دەرەكتى فيلم تۇسىرىلەدى.

ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتكەندەي، دەرەكتى فيلمدى يتاليا، قازاقستان جانە قىتاي مەملەكەتتەرىنىڭ رەجيسسەرلەرى ءتۇسىرىپ شىعادى.

«ماركو پولو تۋرالى دەرەكتى فيلم وتە ماڭىزدى جوبا. سەبەبى، ماركو پولو ءبىزدىڭ جەرىمىز بەن ءداستۇرىمىز تۋرالى تاماشا ەستەلىكتەر قالدىرعان ادام. ماركو پولو ءبىزدىڭ حالىق اراسىنداعى داستۇرلەردى وتە تامسانا جازعان جانە وزگە ەلدەرمەن سالىستىرعاندا، جاقسى جاقتارىن كوپ تەرگەن ساياحاتشى. سوندىقتان زەرتتەۋشى تۋرالى دەرەكتى فيلمنىڭ دە سالماعى اۋىر»، - دەيدى ا. مۇحامەدي ۇلى.

بۇل رەتتە ول دەرەكتى فيلمدى تۇسىرۋگە يتاليا مەن قازاقستان عانا ەمەس، قىتاي دا اتسالىسۋعا دايىن ەكەنىن ايتتى. سەبەبى، ءبارىمىز بىلەتىندەي، ماركو پولونىڭ قىتاي تۋرالى دا ەستەلىكتەرى كوپ.

«ءۇش ەلدىڭ اراسىنداعى ۋاعدالاستىققا سايكەس، فيلمدى ءۇش ەلدىڭ رەجيسسەرلەرى تۇسىرەدى. جالپى، بۇل ماسەلەدە يتاليا، قازاقستان جانە قىتاي اراسىندا ءۇشجاقتى ىنتىماقتاستىق ورناتىپ الۋىمىز كەرەك. قىتاي تاراپىمەن ۋاعدالاستىق ورناتتىق، سەبەبى ماركو پولو قىتايدا تۇرعاندا كوپ دۇنيە جازعان. يتالياندىق رەجيسسەرلەرمەن دە كەزدەستىك. ماركو پولونىڭ جازباسىنا قاراپ دايىندالعان ءۇش سەناري بار»، - دەگەن مينيستر دەرەكتى فيلم 2016-جىلى تۇسىرىلەتىنىن اتاپ ءوتتى.

اۆتور: كەنجەكەي توقتامۇرات قىزى