يتاليا مۇراعاتىنان الىنعان قىپشاقتار سوزدىگىنىڭ ەلەكتروندى نۇسقاسى قازاقستانعا جەتكىزىلدى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«مادەنيەت جانە سپورت مينيسترلىگى مەن يتاليانىڭ مۇراعات كوميتەتى اراسىندا ءتيىستى كەلىسىم بار. وسى كەلىسىمنىڭ ارقاسىندا وتە جاقسى جۇمىستار اتقارىلىپ جاتىر. مىسالى، يتاليانىڭ مۇراعاتىندا دەشتى قىپشاق كەزەڭىندە جازىلعان «كودەكس كۋمانيكۋس» شىعارماسىنىڭ ءتۇپنۇسقاعا جاقىن ءتۇرى ساقتالعان. وسى كەلىسىمنىڭ ارقاسىندا ءبىز وسى قۇجاتتىڭ ەلەكتروندى نۇسقاسىن قازاقستانعا اكەلدىك»، - دەگەن مينيستر بولاشاقتا تاريحي قۇجات نەگىزىندە كىتاپ شىعۋى مۇمكىن ەكەنىن اتاپ ءوتتى.
ا. مۇحامەدي ۇلىنىڭ ايتۋىنشا، بۇدان باسقا، يتاليانىڭ مۇراعاتىنان ۇلتىمىزدىڭ تاريحىنا بايلانىستى باسقا دا قۇجاتتار تابىلعان.
«جالپى، يتاليانىڭ مادەنيەت جانە تۋريزم مينيسترلىگى مۇراعاتتار باس ديرەكتسياسىمەن اراداعى قارىم-قاتىناس ءوز تيىمدىلىگىن كورسەتىپ وتىر. وسى بايلانىستىڭ ارقاسىندا ءبىزدىڭ تاريحىمىزعا قاتىستى وتە كونە كارتانى ۇسىنعان ۆاتيكان جانە ريم مۇراعاتارىنا دا العىس ايتامىز»، - دەدى ا. مۇحامەدي ۇلى.
اۆتور: كەنجەكەي توقتامۇرات قىزى
