ناسا قىزىعۋشىلىق تانىتقان الماتىلىق ستۋدەنت قازاقستاننىڭ العاشقى عارىشكەر ايەلى اتانباقشى - فوتو
بولاشاق عارىش تەحنولوگيالارىنىڭ ينجەنەرى عارىشكەر- ايەل قىزمەتىنە قۇجاتتار تاپسىرۋعا دايىندالىپ جاتىر. «ۇكىمەتتىڭ عارىش باعدارلامالارىنا ۇلكەن ىقىلاس تانىتىپ وتىرعانى ءۇشىن وتە قۋانىشتىمىن. قازاقستاندا عارىشكەر- ايەل قىزمەتى اشىلعان كۇنى كونكۋرسقا قاتىسامىن»، - دەدى قىز.
ول ىرىكتەۋدەن وتۋگە مۇمكىندىگى بار ەكەنىنە سەنىمدى. «ەڭ باستى تالاپ - جوعارى ءبىلىمنىڭ بولۋى، دەنساۋلىقتىڭ جاقسى بولۋى. الداعى جىلى مامىر ايىندا مەن وقۋ بىتىرەمىن، قۇجات تاپسىرۋعا ۇلگەرەمىن. ياعني، بارلىق تالاپقا سايكەس كەلەمىن. عارىشكەرلەردىڭ قيىندىقتارىن بىلمەيمىن. تەك امەريكاداعى ناسا ورتالىعىندا ساياحات كەزىندە عارىش اتتراكتسيونىنا ءمىنىپ كوردىم. دەگەنمەن، قانداي قيىندىق بولسا دا ونى جەڭەتىنىمە سەنىمدىمىن»، - دەدى ستۋدەنت قىز.
ايتا كەتەيىك، نازيفا باقتىبايەۆا الپينيزممەن، قۇزعا شىعۋمەن اينالىسادى. پاراشيۋتپەن بىرنەشە رەت سەكىرگەن. «قىزمەتكە ادام قابىلداعاننان باستاپ مەنى الۋى ءۇشىن كۇرەسەمىن. قازاقستاندا عارىشكەر ايەلدىڭ بولىپ، قازعارىشتا ەرلەرمەن تەڭ جۇمىس ىستەگەنىن قالايمىن»، - دەدى ول.
نازيفا باقتىبايەۆا ب ۇ ۇ جانىنداعى عارىش كەڭىستىگىن بەيبىت پايدالانۋ ۇيىمىندا قازاقستاندى تانىستىرادى. وتكەن جىلدىڭ ءساۋىر ايىندا ول دوستارىمەن بىرگە «پوليتەح 1№» دەگەن اتاۋمەن وربيتالىق سپۋتنيك جاساعان. وسى اپپاراتتىڭ ارقاسىندا ستۋدەنتتەر عارىشتان الىنعان اقپاراتتارمەن زەرتتەۋ جاساۋعا مۇمكىندىك الدى. بيىل ماۋسىم ايىندا ستۋدەنت قىز «بايقوڭىر» ايلاعىنان تاجىريبەدەن ءوتتى.
ەسكە سالا كەتەيىك، 2012-جىلدىڭ ناۋرىزىندا ول حيۋستوندا وتكەن حالىقارالىق وليمپيادادا جۇلدەگەر اتاندى. عارىشتىق جوبالار كونكۋرسىندا شولپانعا اپاراتىن عارىش كەمەسىن تانىستىردى.
كونكۋرستا جەڭىمپاز اتانعانى ءۇشىن وعان تەحاس ۋنيۆەرسيتەتىندە ءبىلىم الۋعا جانە NASA كەشەنىنە بارۋعا مۇمكىندىك بەرىلدى.
