ەريەۆان ۋنيۆەرسيتەتىندە قازاق ءتىلى كۋرسى جۇمىس ىستەيدى
ال وسى ەلدىڭ لينگۆيست مامانى قازاق ءتىلىن مەڭگەرىپ، بىلگەنىن وزگەلەرگە ۇيرەتىپ ءجۇر، دەپ جازادى «حابار» ارناسى.
25 جاستاعى شۋشان حاچاتريان ەندى ارميان، ورىس، اعىلشىن، تۇرىك، قازاق تىلدەرىن بىلەدى. سوڭعى 3 جىلدا ول استاناداعى مەكەمەلەردىڭ بىرىندە جۇمىس ىستەپ، ءبىرقاتار ادەبيەتتەردى وقىپ ۇلگەرگەن. سول كەزدە قازاق ءتىلىن دە مەڭگەرىپ الىپتى. شۋشاننىڭ قازاق تىلىنە دەگەن قۇشتارلىعى مۇحتار اۋەزوۆتىڭ «اباي جولى» ەپوپەياسى ارقىلى ارتقان. ءتىپتى ايگىلى تۋىندىنىڭ نەگىزىندە ول لينگۆيستيكالىق زەرتتەۋلەرىنە دە جاۋاپ تاپتى.
«مەن استانادا بولعان كەزىمدە اباي مەن مۇحتار اۋەزوۆتىڭ جازۋى بويىنشا قازاق ۇلتىن تانىدىم. ياعني سىزدەردىڭ مەيىرىمدى ءارى قايىرىمدى جاندار ەكەندەرىڭىزدى ۇعىندىم»، - دەيدى ەريەۆان مەملەكەتتىك ۋنيۆەرسيتەتىنىڭ اسپيرانتى شۋشان حاچاتريان.
لينگۆيست ءوزىنىڭ دوكتورلىق ديسسەرتاتسياسىنا ۇلتىمىزدىڭ ۇلى تۋىندىلارىن ارقاۋ ەتىپتى. ەندى ول مۇحتار اۋەزوۆتىڭ شىعارماشىلىعىن كەڭىنەن زەرتتەپ، قازاق ءتىلىن تەرەڭىنەن مەڭگەرۋگە كىرىستى.
ەريەۆان ۋنيۆەرسيتەتىندە كەلەر اپتادان باستاپ قازاق ءتىلىن ۇيرەنۋ كۋرسى جۇمىس ىستەيدى. بۇگىندە وعان 20 ستۋدەنت جازىلىپ ۇلگەرگەن.
