استانادا جاس وتباسىلار اراسىندا «بىرگە ءومىر ءسۇرۋ» اتتى فەستيۆال ءوتتى

استانا. قازاقپارات - بۇگىن استانادا كوپ ۇلتتى، ياعني، ەكى ءتۇرلى ۇلت وكىلىنەن قۇرالعان، تاتۋ- ءتاتتى، تالانتتى جاس وتباسىلاردىڭ «بىرگە ءومىر ءسۇرۋ» اتتى فەستيۆالى ءوتتى.

شارانى ۇيىمداستىرىپ وتىرعان ءبىلىم جانە عىلىم مينيسترلىگىنىڭ وكىلدەرى ايتقانداي، بايقاۋدىڭ نەگىزگى ماقساتى - وتباسى قۇندىلىقتارىن دارىپتەپ، ۇلتتار اراسىنداعى تاتۋلىقتى نىعايتۋ.

«بىرگە ءومىر ءسۇرۋ» جاستار فەستيۆالى نەگىزىنەن ەڭ تالانتتى، دوستىعى مەن تاتۋلىعى بەرىك كوپ ۇلتتى وتباسىلاردىڭ ۇلكەن جينالىسى دەسەك بولادى.

فەستيۆال ءبىلىم جانە عىلىم مينيسترلىگى تاراپىنان بيىل ءۇشىنشى رەت ۇيىمداستىرىلىپ وتىر. وزدەرىڭىز بىلەتىندەي، 2015 -جىل قازاقستان حالقى اسسامبلەياسىنىڭ 20 جىلدىعى تويلانىپ جاتقاندىقتان، بيىلعى فەستيۆالدىڭ مازمۇنى دا تەرەڭدەي ءتۇستى»، - دەيدى ب ع م جاستار ساياساتى دەپارتامەنتىنىڭ باسقارما باسشىسى ايتپاي دوسانوۆ.

ونىڭ ايتۋىنشا، قازاقستاننىڭ ءوڭىر- وڭىرىنەن فەستيۆالگە قاتىسامىن دەپ ءوتىنىش بەرگەن وتباسىلار كوپ بولدى. فەستيۆالدىڭ باستى تالابى - وتباسى ەكى ۇلت وكىلىنىڭ بەرىك ءارى تالانتتى وداعى بولۋ كەرەك. سونىمەن قاتار، جۇبايلاردىڭ جاسى 29 دان اسپاۋى كەرەك.

«فەستيۆالدىڭ تالابى بويىنشا، ايماقتارداعى وتباسىلار الدىمەن ونلاين- رەجيمدە ىرىكتەۋدەن ءوتتى. 29 جاسقا تولماعان، ەكى ۇلت وكىلىنەن قۇرالعان وتباسىلار ىرىكتەلىپ، ءوز وڭىرىندە تاعى سىنالدى. وسىلايشا، ەڭ تالانتتى، ەكى ادامنىڭ دا قانداي دا ءبىر سالادا جەتىستىكتەرى بار 10 وتباسى ىرىكتەلىپ، استاناداعى قورىتىندى فەستيۆالگە كەلىپ وتىر»، - دەپ تولىقتىردى ول.

اۆتور: كەنجەكەي توقتامۇرات قىزى