قىتايدان كەلگەن شەبەر قانداسىمىزدىڭ قولىنان شىققان بۇيىمدار ەرەكشە سۇرانىسقا يە - كەسكىن

استانا. قازاقپارات - قاراعاندى وبلىسىنىڭ شاحتينسك قالاسىندا تۇراتىن ەرمەك كارىم - اعاش بۇيىمدارىنىڭ حاس شەبەرى.

ونىڭ قولىنان شىققان بۇيىمدار جۇرت اراسىندا ەرەكشە سۇرانىسقا يە. جاقىندا استانادا قازاق حاندىعىنىڭ 550 جىلدىعىنا وراي وتكەن جارمەڭكەدە ەرمەكتىڭ تۋىندىلارى ەلباسىنىڭ كوزىنە دە ءتۇسىپ ەدى.

سول كەزدە پرەزيدەنت اعاش قىلىش ساتىپ العان. ەرمەك كارىم قىمىز قۇياتىن تەگەنە، ساپتىاياق، پىسپەك، ەت تارتاتىن استاۋلار مەن ۇلتتىق اسپاپتاردىڭ ءتۇر-ءتۇرىن جاسايدى. اتتىڭ ەر- تۇرمانى مەن ابزەلدەرىن دايىنداۋدى دا جەتىك مەڭگەرگەن. بالا كەزىنەن ول اتاسى مەن اعاسىنان شەبەرلىكتىڭ قىر-سىرىن ۇيرەنىپ وسكەن. ەرجەتكەن سوڭ اتا كاسىپتى تارباعاتاي ايماعى ءدوربىلجىن اۋدانىنداعى قولونەرشىلەر كوللەدجىندە شىڭدايدى.

ارمانى اسقاق ازامات اتامەكەنگە كەلىپ، قازاقتىڭ ءتول ونەرىن تۇلەتۋدە.

ەرمەك كارىم، اعاش شەبەرى:

- 2006 -جىلى وتباسىممەن بىرگە قازاق ەلىنە كوشىپ كەلدىم. سودان بەرى ءار ءتۇرلى سالادا جۇمىس ىستەدىم. ەكى-ءۇش جىلدىڭ كولەمىندە وسى جۇمىستى قولعا الىپ، كاسىبىمدى ارى قاراي دامىتسام دەگەن ويمەن ىستەپ كەلە جاتىرمىن. جاقىندا مەملەكەتتەن 2 ميلليون تەڭگە قولداۋ الدىق. قۇرىلعىلار ساتىپ الىپ، قازىر اعاش ىدىستارىنا سۇرانىس كوپ بولىپ وتىر، سونداي-اق قىمىز پىسەتىن كۇبىلەردى جاساپ جاتىرمىز.

ەرمەك كولونەر بۇيىمدارىن كوبىنە قايىڭنان جاسايدى. حالىقتىڭ سۇرانىسىنا يە زاتتاردىڭ ءبىرى -  اعاش قىلىشتار. استانادا قازاق حاندىعىنىڭ 550 جىلدىعىنا وراي وتكەن جارمەڭكەدە ەلباسى اعاشتان جاسالعان قىلىشتى ۇناتىپ، ساتىپ الىپتى. «بۇل ماعان ۇلكەن قۋات بەرىپ، جىگەرلەندىرە ءتۇستى»، - دەيدى شەبەر.

ەرمەك كارىم، اعاش شەبەرى:

- سينحرون: ول كىسىگە بىلاي سىيلىق رەتىندە بەرۋىم كەرەك ەدى. ءبىراق ەلباسى ءوزى باس تارتىپ، ساتىپ الامىز دەدى. ونىڭ ءوزى ءبىزدى، شەبەرلەردى قولداپ- قۋاتتاعانى دەپ بىلەمىن. ول كىسىنىڭ دانالىعى.

قازىر ەرمەك قاسىنا دامير ەسىمدى شاكىرتىن ەرتىپ، بار بىلگەنىن ۇيرەتىپ ءجۇر. جاس ورەننىڭ ۇلتتىق ونەرگە دەگەن ىنتاسى زور.

دامير ىبىرايەۆ، شەبەردىڭ شاكىرتى:

- ەرمەك اعا ماعان ساباق بەرگەن كىسى. وسى كىسىگە كوپ نارسەنى ۇيرەنۋگە كەلدىم. ءبىر ايدىڭ ىشىندە كوپ دۇنيەنى ۇيرەندىم دەپ ايتا المايمىن. ءبىراق الدا ماقساتتارىم كوپ. مەملەكەتتىڭ كومەگىمەن شەبەرحاناعا قاجەتتى زاماناۋي قوندىرعىلار ساتىپ الدى. «ونى ىسكە قوسقان سوڭ جۇمىس ءبىرشاما جەڭىلدەپ، تابىس ەسەلەنەتىنى ءسوزسىز»، - دەيدى شەبەر.