وزبەكستاندىق ازاماتتار قازاقستان شەكاراسىنان ناسىباي الىپ وتپەك بولعان
ق ر ۇ ق ك شەكارا قىزمەتىنىڭ «وڭتۇستىك» وڭىرلىك باسقارماسىنا قاراستى «سارى اعاش» شەكارا وتريادىنىڭ «دوستىق» شەكارا زاستاۆاسىنىڭ شەكارا ناريادى 22 -قازاندا ساعات 00.30 شاماسىندا ءتۇن قاراڭعىلىعىن پايدالانىپ وزبەكستاننان قازاقستانعا قاراي مەملەكەتتىك شەكارانى بۇزىپ وتكەن ءۇش وزبەكستان ازاماتىن (1978 -جىلى تۋعان ءبىر ەر ادام مەن 1972، 1977 -جىلدارى تۋعان ەكى ايەل ادامدى) ۇستادى.
38 جاستاعى ازيزا ەسىمدى ايەلدىڭ قول جۇگىنەن ءارقايسىسى 100 گرامدىق، 32 تۇيىنشەككە سالىنعان ناسىباي تابىلدى. مەملەكەتتىك شەكارانى بۇزۋ دەرەگىنىڭ ءوزى قىلمىستىق ءىس ەكەندىگى ءوز الدىنا، ۇستىمىزدەگى جىلدىڭ 18 -ساۋىرىنەن باستاپ، قازاقستان رەسپۋبليكاسىنىڭ «دەنساۋلىق ساقتاۋ ماسەلەلەرى بويىنشا كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭىنا سايكەس، قۇرامىندا نيكوتين مەن شايىرلىق زاتتارى شەكتەن تىس كوپ تەمەكى ونىمدەرىن ەل اۋماعىنا ەنگىزۋگە، دايىنداۋعا، ساتۋعا جانە تاراتۋعا تىيىم سالىنعان. ونىڭ ىشىنە ناسىباي دا بار.
ەندى ۇستالعان ازاماتتار ناسىباي تاسىمالداعانى ءۇشىن دە جاۋاپقا تارتىلاتىن بولادى.
