ۇلتتىق بانك استاناعا ازىرگە كوشپەيدى - ق. كەلىمبەتوۆ

الماتى. قازاقپارات - قازاقستان رەسپۋبليكاسىنىڭ ۇلتتىق بانكى استانعا ازىرگە كوشپەيدى. بۇل تۋرالى بۇگىن الماتىدا حالىقارالىق ۆاليۋتا قورىنىڭ ورتالىق ازيا جانە كاۆكاز وڭىرلەرىنە ارنالعان «وڭىرلىك ەكونوميكالاردىڭ دامۋ كەلەشەگى» اتتى بايانداماسىنىڭ تانىستىرىلىمى بارىسىندا ق ر ۇلتتىق بانكىنىڭ ءتوراعاسى قايرات كەلىمبەتوۆ ءمالىم ەتتى.

«ازىرگە استاناعا كوشپەيمىز. جالپى، استانادا قۇرىلاتىن حالىقارالىق قارجى ورتالىعى قازاقستاندا ءالى جەتكىلىكتى دامىماعان باسقا قارجى قىزمەتتەرىن الداعى 5-10 جىل ىشىندە دامىتۋعا ارنالعان. ولار - قوعامدىق جانە جەكە كاپيتالدى باسقارۋ، يسلام قارجىلاندىرۋ جۇيەسى، حالىقارالىق كاپيتال نارىعىندا زەينەتكەرلىك قارجىنى باسقارۋ جانە باسقا دا سالالار. ال بانك ريتەيلى، ياعني جەكە كليەنتتەرگە قىزمەت كورسەتۋ كەشەنى، ساقتاندىرۋ كومپانيالارىنىڭ ريتەيلى قازىرگى قارجى سەكتورىندا، ياعني الماتىدا جۇزەگە اسىرىلاتىن بولادى. ويتكەنى، الماتىنىڭ اينالاسىندا 2-3 ميلليون ادام ءومىر سۇرەدى. ۇلتتىق بانك جانە ونىڭ بولىمشەلەرى دە وسى جەردە ورنالاسقان»، - دەدى ق. كەلىمبەتوۆ.

ۇلتتىق بانكتىڭ ءتوراعاسى ۇلتتىق رەگۋلياتوردىڭ قالىپتى جاعدايدا جۇمىس ىستەپ جاتقاندىعىن جانە قازىرگى قارجى ۇنەمدەۋ جاعدايىندا ۇكىمەتتىڭ كوشۋدى تالاپ ەتىپ جاتقان جوقتىعىن ايتتى.

«ءبىز كوشۋگە اسىعىپ جاتقان جوقپىز. بۇل جەردە ەكى حابتىڭ اراسىندا ەشقانداي انتوگونيزم جوق. ءبىر حاب ءداستۇرلى بانك جانە ساقتاندىرۋ سالاسىنداعى قىزمەتتەردى دامىتۋمەن اينالىسادى جانە ورتالىق ازيا ايماعىن قامتيدى. ال استاناداعى حالىقارالىق قارجى ورتالىعى كەدەندىك وداق جانە شاڭحاي ىنتىماقتاستىق ۇيىمى دەڭگەيىندە قىزمەت اتقارادى جانە قازاقستانعا ينۆەستيتسيا تارتۋعا باعىتتالعان. ءبىراق، ەلباسىنىڭ قاۋلىسىنا سايكەس، ۇلتتىق بانكتىڭ بەلگىلى ءبىر بولىمشەلەرى الداعى ۋاقىتتا استاناعا كوشەدى»، - دەدى ق. كەلىمبەتوۆ.

اۆتور: جاپپاربەرگەن ايبوتا