ءتورت يادرولىق دەرجاۆا مۇشە ە ق ى ۇ مەملەكەتتەر اراسىنداعى سەنىمنىڭ نىعايۋىنا ىقپال ەتۋى كەرەك - ق. توقايەۆ
بۇل تۋرالى بۇگىن سىرتقى ىستەر مينيسترلىگىندە ءوتىپ جاتقان «حەلسينكي قورىتىندى اكتىسىنىڭ (1975) جانە استاناداعى سامميتتىڭ (2010) مەرەيتويىنا ارنالعان ە ق ى ۇ جەتىستىكتەرى مەن قاتەرلەرى» اتتى حالىقارالىق كونفەرەنتسيا بارىسىندا ءسوز العان ق ر پارلامەنت سەناتىنىڭ ءتوراعاسى قاسىم-جومارت توقايەۆ ءمالىم ەتتى.
«ءبىز قازىر وزگەرىستەر مەن تولقۋلار زامانىندا ءومىر ءسۇرىپ جاتىرمىز. جىل سايىن ادامزات، قارۋلى قاقتىعىس، شيەلەنىس، ەكونوميكالىق داعدارىس نەمەسە ادام ساۋداسى، بوسقىندار ماسەلەسى، ەسىرتكى ساۋداسى، يادرولىق ماتەريالداردىڭ تارالۋى مەن قارۋ-جاراق «جارىسى» نەمەسە تابيعي اپاتتار سياقتى قاۋىپ-قاتەردى باسىنان كەشىپ وتىر»، - دەگەن سەنات ءتوراعاسى مىسال رەتىندە ۋكراينادا ورىن العان جاعدايعا توقتالدى.
«ۋكرايناداعى داعدارىس ءبىر جاعىنان وسى ەلدىڭ حالقى ءۇشىن ناعىز تراگەدياعا اينالسا، ەكىنشى جاعىنان، الەمدەگى تۇراقتىلىققا سىزات ءتۇسىردى. قازىرگى پىكىرتالاس ب ۇ ۇ- نىڭ جارعىسى مەن حەلسينسكي قورىتىندى اكتىسىندە بەكىتىلگەن نەگىزگى نورمالار مەن حالىقارالىق قۇقىق تۋرالى پرينتسيپتەرگە ءارتۇرلى تۇسىنىك بەرىپ ءجۇر. ساياساتكەرلەر مەن ديپلوماتتار ايتىپ جۇرگەن پىكىردى ەكى جاققا تارتاتىن ماسەلەلەر ۋكرايناداعى شيەلەنىستەن دە بۇرىن باستالعان ەدى. سوندىقتان، ەۋروپاداعى قاۋىپسىزدىك جانە ىنتىماقتاستىق ۇيىمىنا بۇرىنعىدان دا زور ءۇمىت ارتامىز. 57 مەملەكەت، سونىڭ ىشىندە، ءتورت يادرولى دەرجاۆا مۇشە فورۋم ورتاق قاۋىپسىزدىك ءۇشىن ەلدەر اراسىنداعى سەنىمنىڭ نىعايۋىنا ىقپال ەتۋى مۇمكىن جانە ىقپال ەتە الادى دا»، - دەدى ق. توقايەۆ.
اۆتور: كەنجەكەي توقتامۇرات قىزى
