قۋعىنداعى قۇرمانبەك باكيەۆ قىرعىزستانعا دەگەن ماحابباتى تۋرالى كىتاپ شىعاردى
قىرعىزستاننىڭ بۇرىنعى پرەزيدەنتى قۇرمانبەك باكيەۆتىڭ مالىمدەۋىنشە، ول 2014-جىلدىڭ قاراشاسىندا جازا باستاعان كىتابىن بيىل جازدا اياقتاعان، ءبىراق تۋعان ەلىندە پارلامەنت سايلاۋىنا ازىرلىك ءجۇرىپ جاتقاندىقتان، باسپادان شىعارۋدى ءسال كەيىنگە قالدىرا تۇرۋدى ۇيعارعان. بەلارۋستىڭ بەلتا اگەنتتىگى ونىڭ «شارۋاعا ارالاسىپ، جۇرتتى دۇرلىكتىرىپ جاتىر دەپ ايتپاسىن دەپ ويلادىم» دەگەن سوزدەرىن كەلتىرگەن.
قۇرمانبەك باكيەۆتىڭ مەمۋار كىتابىن پاراقتاپ شىققان بەلارۋستىك «سپۋتنيك» سايتى ءتىلشىسىنىڭ جازۋىنشا، 200 بەتتىك سۋرەتتى كىتاپ 19 تاراۋدان تۇرادى. ولاردىڭ اراسىندا «ءبارى قالاي باستالدى»، «كورشى - ءتاڭىر سىيى»، «ناۋرىز توڭكەرىسى جايلى»، «جاپپاي كۇيرەۋ زامانى»، «ماناستاعى» ا ق ش بازاسى تۋرالى»، «بىشكەكتەگى 7- ءساۋىر»، «2010-جىلدىڭ ماۋسىمىنداعى قاسىرەتتى كۇندەر»، «بيلىك ەتۋ فورمالارى جانە سايلاۋ تۋرالى» اتتى تاراۋلار بار.
ورىس جانە قىرعىز تىلىندە ەكى مىڭ دانا تيراجبەن شىققان كىتاپتىڭ اننوتاتسياسىندا «ءار باسشىنىڭ ومىرىندە اسقان جاۋاپكەرشىلىكپەن ارەكەت ەتەتىن، ءار ءسوزىڭدى بەزبەندەپ سويلەيتىن، ءار قادامىڭدى اڭداپ باساتىن كۇندەر بولادى. بۇل كىتاپ - قۇرمانبەك ساليەۆيچ باكيەۆتىڭ ءدال وسىنداي ءومىر كەزەڭى تۋرالى ەستەلىكتەرى» دەپ جازىلعان.
ءار باسشىنىڭ ومىرىندە اسقان جاۋاپكەرشىلىكپەن ارەكەت ەتەتىن، ءار ءسوزىڭدى بەزبەندەپ سويلەيتىن، ءار قادامىڭدى اڭداپ باساتىن كۇندەر بولادى.
بەيبىت شەرۋشىلەرگە وق اتۋعا بۇيرىق بەرگەنى ءۇشىن ەلىندە ءومىر بويىنا باس بوستاندىعىنان ايىرۋ جازاسىنا كەسىلگەن قۇرمانبەك باكيەۆ 2010-جىلدان بەرى بەلارۋس ەلىندە تۇرادى.
2010-جىلى ساۋىردە ەلدە ۇكىمەتكە قارسى نارازىلىق باستالعاننان كەيىن قىرعىزستان پرەزيدەنتى قىزمەتىنەن قۋىلعان. بىرنەشە كۇنگە سوزىلعان نارازىلىق شەرۋلەرى كەزىندە 80 نەن اسا ادام قازا تاپتى. ءساۋىردىڭ 15 ىندە قازاقستاندىق اسكەري ۇشاق ونى وتباسىمەن بىرگە قازاقستاننىڭ وڭتۇستىگىندەگى تاراز قالاسىنا اكەلگەن. ءساۋىردىڭ 20 سى كۇنى بەلارۋس پرەزيدەنتى الەكساندر لۋكاشەنكو باكيەۆ وتباسىمەن مينسكىدە ەكەنىن مالىمدەگەن.
ازاتتىقتىڭ بەلارۋس قىزمەتىنىڭ حابارلاۋىنشا، قازىر قۇرمانبەك باكيەۆ مينسكىنىڭ «پرەزيدەنتتىك» دەپ اتالاتىن ۆەسنينا اۋدانىندا تۇرىپ جاتىر. مەملەكەتتىڭ جوعارى باسشىلىعىنداعى شەنەۋنىكتەردىڭ ءبارى دەرلىك وسى اۋداندا قونىستانعان. باكيەۆ جۇرت الدىنا مۇلدە شىقپايدى. ەلىندە بولىپ جاتقان وقيعالار مەن ءوزى جايلى قاۋەسەتتەرگە قاتىستى عانا ارا-تۇرا كوممەنتاري بەرەدى.
مىسالى، 2011-جىلى ول «قىرعىزستاننىڭ بۇرىنعى پرەزيدەنتى بەلارۋس اسكەري زاۋىتىنىڭ ديرەكتورى بولىپ تاعايىندالدى» دەگەن اقپاراتتى جوققا شىعارعان.
بەيبىت شەرۋشىلەرگە وق اتۋعا بۇيرىق بەرگەنى ءۇشىن ەلىندە ءومىر بويىنا باس بوستاندىعىنان ايىرۋ جازاسىنا كەسىلگەن قۇرمانبەك باكيەۆ 2010-جىلدان بەرى بەلارۋس ەلىندە تۇرادى.
ول بەلارۋس ەلىندە ازاماتتىق نەكەدەگى ايەلى جانە ەكى بالاسىمەن بىرگە تۇرادى دەپ حابارلانعان. 2011-جىلى نازگۇل تولومۋشيەۆا قىرعىزستاننىڭ «ايات-پرەسس» گازەتىنە قۇرمانبەك باكيەۆپەن 1995-جىلدان 16 جاسىنان بەرى تۇراتىنىن مويىنداعان. ينتەرنەتتە باكيەۆتىڭ جاس كەلىنشەگى ەكەۋىنىڭ كىشكەنتاي قىزى جانە ۇلىمەن تۇسكەن فوتوسۋرەتتەرى جاريالانعان.
قۇرمانبەك باكيەۆكە، ونىڭ تاتيانا باكيەۆامەن نەكەسىنەن تۋعان ۇلكەن ۇلدارى مارات پەن ماكسيمگە جانە ءىنىسى جانىشقا ت م د ەلدەرى تەرريتورياسىندا مەملەكەتارالىق ىزدەۋ جانە ينتەرپول جەلىسى ارقىلى حالىقارالىق ىزدەۋ جاريالانعان. مينسك قىرعىزستاننىڭ بۇرىنعى پرەزيدەنتى قۇرمانبەك باكيەۆ پەن ونىڭ وتباسى مۇشەلەرىن بىشكەككە بەرۋدەن باس تارتقان سوڭ 2012-جىلدىڭ تامىزىندا بەلارۋستەگى قىرعىز ەلشىسى كەرى شاقىرتىلىپ الىنعان. ءۇش جىلدان كەيىن بەلارۋستەگى قىرعىزستان ەلشىلىگى جۇمىسىن قايتا باستادى. ول كەزدە قىرعىزستان سىرتقى ىستەر مينيسترلىگى وكىلى نۇرلان سۋەركۋلوۆ «قۇرمانبەك باكيەۆتى ەكستراديتسيالاۋ شارالارىن ىسكە اسىرۋ ءۇشىن ەلشىلىك جۇمىسىن قايتا باستادى» دەپ مالىمدەگەن.
2013-جىلى قۇرمانبەك باكيەۆ «بەلارۋس بيلىگىن مەنى ەكستراديتسيالاۋعا كوندىرۋگە تىرىسۋ ارەكەتتەرىن بەكەرشىلىك دەپ سانايمىن» دەپ مالىمدەگەن. باكيەۆتىڭ ايتۋىنشا، ول 2010-جىلى بەلارۋس ازاماتتىعىن العاندىقتان، زاڭعا سايكەس ەكستراديتسيالاۋعا جاتپايدى.
«ازاتتىق»
