الماتىدا رەجيسسەر ازيز جامباكيەۆتىڭ «شاتىرقانات كوبەلەك» كوركەم فيلمىنىڭ ءتۇسىرىلىمى باستالدى
فيلمنىڭ رەجيسسەرى - الماتىلىق ازيز جامباكيەۆ. باستى رولدەردى نەللي تساي، قۋات ابەشيەۆ، ايگەرىم مۇستافا سومدايدى. سونداي-اق، بۇل كينوكارتيناعا تۇسۋگە اسەل ساعاتوۆا، ارۋجان جازىلبەكوۆا جانە قارلىعاش مۇحامەدجانوۆا شاقىرىلعان.
ال فيلمنىڭ پروديۋسەرلەرى - ازيز جامباكيەۆتىڭ ءوزى جانە ناتاليا راستوروپنوۆا مەن ەدۋارد كيم.
پوست-پروداكشن، ياعني مونتاجداۋ، دىبىستاندىرۋ جۇمىستارى الداعى قاراشا ايلارىندا ماسكەۋ جانە بەرلين قالالارىندا جۇرگىزىلەدى.
اتالمىش تۋىندى ايەل زاتىنىڭ ىشكى دۇنيەسى مەن ءتۇس كورۋ تاقىرىبىن قوزعايدى. مۇندا باستى كەيىپكەر - جانەلدىڭ ءومىرى كۇن سايىن قايتالانىپ كەلە بەرەتىن بەلگىلى ءبىر ارەكەتتەردىڭ جۇيەسى ىسپەتتەس. ءبىراق، ونىڭ ءتۇسى اقىر اياعىندا ونى ءوزىنىڭ ايەلگە ءتان نازىكتىگىن جانە تاعدىرىن ۇعىنۋعا مۇمكىندىك بەرەدى.
«مەن ءۇشىن كلاسسيكالىق سيۋجەتتەن كورى تۇيسىككە قۇرالعان كينو ءتۇسىرۋ ماڭىزدى بولدى. ارينە، الەۋمەتتىك دراما نەمەسە مەلودراما تۇسىرۋگە بولار ەدى. ءبىراق ءبىز كينو ءتىلىن پايدالانا وتىرىپ، ايەل تاعدىرىن، ونىڭ تۇيسىگىندەگى ۇدەرىستەر مەن ىشكى جان دۇنيەسىن پاش ەتكىمىز كەلدى. بۇل مەن ءۇشىن وتە ماڭىزدى جۇمىس»، - دەدى رەجيسسەر.
ايتا كەتەلىك، ازيز جامباكيەۆ بەرلين كينوفەستيۆالىنىڭ لاۋرەاتى، «ەڭ ۇزدىك وپەراتورلىق جۇمىس» اتالىمى بويىنشا كۇمىس ايۋدىڭ يەگەرى. ازيا كينواكادەمياسىنىڭ قۇرمەتتى مۇشەسى.
اۆتور: جاپپاربەرگەن ايبوتا
