پاۆلودارلىق ءۇش وقۋشى جاپونيا ەلىندە وتكەن حالىقارالىق كونكۋرستان جەڭىسپەن ورالدى

 استانا. قازاقپارات - پاۆلودار قالاسىنداعى № 2 بالالار كوركەمسۋرەت مەكتەبىنىڭ وقۋشىلارى جاپونيا ەلىنىڭ كاناگاۆا قالاسىندا وتكەن XVIII حالىقارالىق سۋرەت كونكۋرسىندا لاۋرەات اتاندى،

دەپ حابارلايدى pavlodarnews.kz.

وبلىستىق ءبىلىم بەرۋ باسقارماسى ۇسىنعان اقپاراتقا سۇيەنسەك، اتالمىش كونكۋرس الەمنىڭ تۇكپىر- تۇكپىرىنەن كەلگەن بالالاردىڭ جاس ايىرماشىلىعى مەن جۇمىستاردىڭ ورىندالۋ تەحنيكاسى جاعىنان ەرەكشەلەنگەن.

 «بيىل قازاقستاننىڭ ءار ءتۇرلى ايماقتارىنان قاتىسقان 249 جەتكىنشەكتىڭ سەگىزى لاۋرەات اتانعان. ولاردىڭ ۇشەۋى - پاۆلودار قالاسى مەكتەبىنىڭ وقۋشىلارى»، - دەدى وبلىستىق ءبىلىم بەرۋ باسقارماسىنىڭ مامانى بالجان ءادىلحانوۆا. الينا گيبادۋلينا «تۇنگى قالا» اتتى سۋرەتى ءۇشىن ءبىرىنشى دارەجەلى ديپلوممەن، ازيزا يمانقۇلوۆا «شىعىس ەرتەگىلەرى» سۋرەتىمەن ەكىنشى دارەجەلى ديپلوممەن جانە اسان قايسا «دوستاردىڭ تۇنگى قالاداعى كەزدەسۋى» اتتى سۋرەتىمەن ءۇشىنشى دارەجەلى ديپلوممەن ماراپاتتالدى.