استاناداعى ت م د زيالى قاۋىم وكىلدەرىنىڭ فورۋمىندا ساراپشىلار توزىمدىلىك ماسەلەلەرىنە ەرەكشە ءمان بەردى

استانا. قازاقپارات - استاناداعى ت م د- عا قاتىسۋشى ەلدەردىڭ شىعارماشىلىق جانە عىلىمي زيالى قاۋىم وكىلدەرىنىڭ ونىنشى فورۋمىندا دوستاستىق ەلدەرىنىڭ ساراپشىلارى حالىقارالىق كۇن تارتىبىندەگى ماسەلەلەرگە ەرەكشە ءمان بەردى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ت م د مەملەكەتارالىق گۋمانيتارلىق ىنتىماقتاستىق قورى باسقارما ءتوراعاسى، رەسەيدەگى ازەربايجاننىڭ ەلشىسى پولاد بيۋلبيۋل وعلى ءمالىم ەتتى.

«بۇگىندە الەمنىڭ ءبىرقاتار جەرلەرىندە تىنىشتىقتىڭ بەرەكەسى كەتكەنىن بارلىعى بىلەدى. بۇل وقيعالار بىزدەن الىس ەمەس ەلدەردە بولىپ جاتىر. سوندىقتان دا ءتۇرلى ەلدەردەن كەلگەن ساراپشىلار ءوزارا پىكىر الماسىپ، ءوز بويىندا تولەرانتتىلىقتى، توزىمدىلىكتى قالىپتاستىرۋى وتە ماڭىزدى. وسى فورۋم جاڭا يدەيالاردى تالقىلاپ، ولاردى العا جىلجىتۋ ءۇشىن، قارىم-قاتىناستاردى تەرەڭدەتۋ تۇرعىسىندا جاقسى الاڭ بولىپ وتىر»، - دەدى پولاد بيۋلبيۋل وعلى.

سونىمەن قاتار ول سەلينوگراد كەزىندە وسىندا بولعانىن ايتا كەلە: «كەيىننەن بۇل قالا استانا اتاندى. كەزىندەگى شاعىن قالادان، جازىقتا بۇنداي تاماشا شاھاردىڭ سالىنعانىنا تاڭدانىپ وتىرمىن. وسىندا كوركەم ساۋلەتتىك عيماراتتار تۇرعىزىلعانىن بايقادىم»، - دەدى ەلشى.

بۇدان بۇرىن حابارلانعانداي، استاناداعى ۇلتتىق مۋزەيدە ت م د- عا قاتىسۋشى ەلدەردىڭ شىعارماشىلىق جانە عىلىمي زيالى قاۋىم وكىلدەرىنىڭ ونىنشى فورۋمى جۇمىسىن باستادى. فورۋمعا دوستاستىق مەملەكەتتەرىنەن 200 گە جۋىق دەلەگاتتار شاقىرىلدى. بيىلعى بۇل شارا «دوستاستىقتىڭ گۋمانيتارلىق كەڭىستىگى: ورتاق قۇندىلىقتار مەن مادەنيەتتەر ديالوگى» تاقىرىبىنا ارنالىپ وتىر.

اۆتور: رۋسلان عابباسوۆ