كارتوپپەن ەمدەلەيىك

استانا. قازاقپارات  -ءاربىر ءۇيدىڭ اسحاناسىندا بۇل كوكونىستىڭ كەزدەسەتىنى انىق. كارتوپتان مىڭداعان تاماق ءتۇرىن دايىنداۋعا بولادى ەكەن.

سونىمەن قاتار، كارتوپتىڭ ءۇي جاعدايىندا ەمدەلۋگە دە پايداسى زور. كەيبىر اۋرۋلاردى كارتوپپەن جەڭىل ءارى ءتيمدى ەمدەۋ ادىستەرىن ۇسىنامىز.

انگينا

كارتوپتاردىڭ ۇساعىن تاڭداپ الامىز. جاقسىلاپ جۋىپ، ىدىسقا از مولشەردە سۋ قۇيىپ، قايناتامىز. سۋدى از قۇيۋىمىزدىڭ سەبەبى، بۋ سۋدان ەمەس، كارتوپتان شىعۋى ءتيىس. كارتوپتىڭ ءيىسى قاتتى شىققان سوڭ، وتتى ءسوندىرىپ، ىستىق ىدىستى ۇستەلدىڭ ۇستىنە اكەلىپ قويامىز. باسىمىزدى كورپەمەن بۇركەپ الىپ، ىدىستىڭ ىشىنە مۇرنىمىزبەن 10-15 مينۋت شاماسىندا تەرەڭ دەمالامىز. بۋمەن دەمالىپ بولعان سوڭ، سالقىنداپ قالماس ءۇشىن جىلدام كورپە جامىلىپ جاتىڭىز. كۇنىنە 1-2 رەت جاساعان ءجون. جوعارىدا جازىلعانداي ەمدەۋ جولى انگينانى قايتارۋعا جانە تىنىس الۋ جولدارىنىڭ قابىنۋىن باسۋعا كومەكتەسەدى.

جوعارى تەمپەراتۋرا

2 كارتوپتى ۇككىشتەن ءىرى ەتىپ وتكىزەمىز. وعان 1 اس قاسىق سىركە سۋىن قۇيىپ، بىرنەشە قاباتتالعان داكەنىڭ ۇستىنە سالىپ شىعىڭىز. دايىن كومپرەسستى ماڭدايىڭىزعا قوياسىز. ءبىراز ۋاقىتتان سوڭ الىپ تاستاپ، باسقا جاڭاسىن دايىنداپ ماڭدايىڭىزعا قويىڭىز. وسى ادىسپەن انگينانى كەتىرۋگە دە پايدالانساڭىز بولادى. ول كەزدە كومپرەسستى موينىڭىزعا قويىپ، ۇستىنەن جىلى ورامالمەن بايلاپ تاستايسىز.

ءۇسۋ

سۋىقتان قولىڭىز قىزارىپ كەتسە، قولىڭىزدى كارتوپ قايناتىلعان جىلى سۋعا سالىپ، بىرنەشە ۋاقىت ۇستاعاننىڭ ءوزى جەتكىلىكتى. بەت تەرىسىنىڭ ءۇسىپ كەتكەن بولىكتەرىنە كارتوپ كومپرەسىن جاساۋعا بولادى. ول ءۇشىن قابىعى اشىلماعان كارتوپتاردى قايناتىپ، ىستىق كۇيىندە جىلدام ەزىڭىز. ىستىعىن جوعالتپاۋى ءتيىس. داكەگە نەمەسە ماتا بولىگىنە كارتوپ ەزبەسىن جاعىپ، زاقىمدالعان جەرىڭىزگە سۋىپ كەتكەنشە ۇستاۋ قاجەت. ودان سوڭ ماقتانى ليمون شىرىنى مەن سۋ ارالاسقان سۇيىقتىققا مالىپ، زاقىمدالعان جەردى بىرنەشە رەت ءسۇرتىڭىز.

كۇيىك

كارتوپتى تازالاپ، ۇككىشتەن وتكىزىڭىز. ونى 4-5 رەت ورالعان داكەگە سالىپ شىعىڭىز. داكەنى زاقىمدالعان جەرگە قويىپ، ۇستىنەن جاقسىلاپ بايلاپ شىعىڭىز. 2 ساعاتتان سوڭ الىپ تاستاپ، باسقا جاڭاسىنا اۋىستىرىڭىز. ەگەر قايناپ جاتىرعان سۋ جانە ماي تامشىلارىنا كۇيىپ قالساڭىز نەمەسە قولىڭىزدى ىستىق ىدىسقا باسىپ الساڭىز، اۋىرىپ تۇرعان جەرىڭىزگە جىلدام كارتوپتى تازارتىپ، ەكىگە ءبولىپ باسىڭىز. ءار 2-3 مينۋت سايىن اۋىستىرىپ، جاڭا كارتوپ بولىكتەرىن باسۋ قاجەت.

massaget.kz