بەلتا جانە قازاقپارات اگەنتتىكتەرى «سوزۆۋچيە» پورتالىنىڭ سەرىكتەستەرى بولا الادى - بەلارۋس اقپارات ءمينيسترى
وسى ورايدا وسى جيىنعا سپيكەر رەتىندە كەلگەن بەلارۋس اقپارات ءمينيسترى ليليا انانيچ «قازاقپارات» اگەنتتىگىنە سۇحبات بەرىپ، ەكى ەلدىڭ اراسىندا بۇل سالاداعى ىنتىماقتاستىعى تۋرالى اڭگىمەلەدى.
ونىڭ سوزىنە قاراعاندا، ت م د- عا قاتىسۋشى ەلدەردىڭ شىعارماشىلىق جانە عىلىمي زيالى قاۋىم وكىلدەرىنىڭ فورۋمى جاقسى جوبالاردىڭ تۇتاس تىزبەگىن قالىپتاستىردى. بۇل تۇرعىدا تالقىعا سالىنىپ وتىرعان تاقىرىپتار مۇراجاي، تەاتر ىستەرى جانە ءبىلىم سالاسىنداعى ىنتىماقتاستىقپەن عانا شەكتەلىپ وتىرعان جوق. ەڭ باستى تاقىرىپتاردىڭ ءبىرى اقپاراتتىق ىنتىماقتاستىققا ارنالىپ وتىر.
«بيىل ونىنشى رەت وتكەن بەلارۋس حالىقارالىق مەديا-فورۋمى جوبامىز بۇگىندە ت م د ەلدەرىمەن قاتار الىس شەتەلدەن مامانداردى تارتۋعا قاۋقارلى بولىپ وتىر. بىزگە ءبىر فورۋمنان كەيىن كەلەسى فورۋمدا عانا كەزدەسۋ ازدىق ەتەدى. وسى ورايدا بىزدە اقپاراتتىق الاڭدار كوبىرەك بولعان ءجون»، - دەپ ويىمەن ءبولىستى مينيستر.
ل. ءانانيچتىڭ ايتۋىنشا، بەلارۋس تاراپىنان Х فورۋمعا كەلگەن دەلەگاتسيا «سوزۆۋچيە» ينتەرنەت-پورتالىن قولداۋعا جانە ونى دەرەكتەرمەن تولتىرۋدا ت م د ەلدەرىنىڭ كۇش-جىگەرىن بىرىكتىرۋ ۇسىنىسىمەن كەلىپ وتىر. وسى ەلدە قۇرىلعان بۇل پورتال ت م د ەلدەرىندەگى ادەبيەتتى ءوزارا بىرىكتىرۋگە نەگىزدەگەن ۆيرتۋالدى الاڭ بولىپ تابىلادى.
«بۇل ينتەرنەت-پورتالدا قازاقستاننىڭ جانە باسقا دا ەلدەردىڭ ادەبيەتى، ۇلى قۇندىلىقتارى تۋرالى اقپاراتتى تابا الاسىزدار. ياعني، وسى الاڭ ناقتى جۇمىستارىمەن كوزگە كورىنىپ وتىر. ءبىز «سوزۆۋچيە» پورتالى ت م د ەلدەرىن بىرىكتىرەتىن ينتەرنەت-پورتالى بولۋى باعىتىندا جۇمىس ىستەۋدەمىز»، - دەپ توقتالدى ول.
وسى ورايدا ليليا انيچ عالامتور كەڭىستىگى قوسىمشا قوماقتى قارجىلىق شىعىنداردى قاجەت ەتپەيتىندىگىن ايتا كەلە، قىزىعۋشىلىق تانىتقان تاراپتار بولعان جاعدايدا ىنتىماقتاستىق ءۇشىن جاقسى اقپاراتتىق تۇعىرنامانى قۇرۋعا بولاتىندىعىن جەتكىزدى.
«سوزۆۋچيە» الاڭى گۋمانيتارلىق اقپاراتتىق كەڭىستىكتى دامىتۋعا باعىتتالعان. سەبەبى، ءبىزدىڭ ەلدەردىڭ (ت م د ەلدەرىندە) اۋماعىندا ءوتىپ جاتقان ءار ءتۇرلى جوبالار مەن ۇدەرىستەر اقپاراتتىق رەسۋرستا توپتالۋى ءتيىس دەپ پايىمدايمىز. وسى ورايدا ءبىزدىڭ ۇلتتىق بۇقارالىق اقپاراتتىق قۇرالدارى، بۇل تۇرعىدا بەلتا جانە قازاقپارات اگەنتتىكتەرى وسى الاڭدا سەرىكتەس بولا الار ەدى. بۇنداي بىرلەستىرۋشى جوبامەن قازاقستانداعى فورۋمعا كەلىپ وتىرمىز جانە ت م د ەلدەرى اراسىندا قولداۋ تابامىز دەپ ويلايمىن»، - دەپ قوستى مينيستر.
مۇنىمەن قوسا، ول قازاقستان مەن بەلارۋستىڭ ەكىجاقتى ىنتىماقتاستىعىنا توقتالا كەلە، ەكى ەلدىڭ ۇكىمەتتەرى اراسىندا باسپا جانە اقپارات سالاسىنداعى ىنتىماقتاستىق تۋرالى كەلىسىمگە قول قويۋ دايارلانعانىن اتاپ ءوتتى.
«بۇگىندە ناقتى سەرىكتەستىك بايلانىستار مەن جوبالاردىڭ قاجەتتىگىن جاقسى تۇسىنەمىز. ەگەر بەلارۋس پەن قازاقستاننىڭ ۇلتتىق اقپاراتتىق كەڭىستىگى تۋرالى ايتاتىن بولساق، ءبىز ءارقاشان ۇندەستىكتە، دوستاستىقتا جۇمىس ىستەپ، ءبىزدىڭ ۇلتتىق الەۋەتتەردى نىعايتۋعا قىزمەت ەتتىك. ياعني، بۇل تۇرعىدا ءبىزدىڭ جالپى الەۋەتىمىزدى بەكەمدەۋگە ۇلەس قوسىپ وتىرعانىمىزدى اتاپ وتكەن ءجون»، - دەپ ءتۇيدى بەلارۋس اقپارات ءمينيسترى.
اۆتور: رۋسلان عابباسوۆ
