جوعارى ناتيجە كورسەتكەن مەملەكەتتىك قىزمەتكەرلەر بونۋستارمەن ىنتالاندىرىلادى

استانا. قازاقپارات - «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنداعى تۇزەتۋلەرگە سايكەس، مەملەكەتتىك قىزمەتشىلەردىڭ ەڭبەك اقىسى ونىڭ اتقارعان جۇمىسىنىڭ تيىمدىلىگى مەن ناتيجەلىلىگىنە قاتىستى بولادى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى سايان احمەتجانوۆ ءمالىم ەتتى.

ەسكە سالايىق، بۇگىن پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭ جوباسى تالقىلانىپ، قابىلدانعان بولاتىن.

اتاپ ايتقاندا، مەملەكەتتىك قىزمەتكەرلەر ءۇشىن ناتيجەلىلىك بويىنشا ەڭبەكاقى جۇيەسى ەنگىزىلەدى. بۇل «بىردەي ەڭبەك ءۇشىن بىردەي ەڭبەكاقى» قاعيداتىن قامتاماسىز ەتىپ، وسى ماقساتتا قۇقىقتىق نەگىز بەلگىلەنەدى.

«بۇل زاڭدا تيىمدىلىك، ناتيجەلىلىك جانە ماقساتتى كورسەتكىشتەرگە جەتۋ ناتيجەلەرى بويىنشا ەڭبەكاقى تولەۋ جاڭا جۇيەسىنىڭ تەتىكتەرى ەنگىزىلدى. فاكتورلى- بالدىق مەجە نەگىزىندە ەرەكشە ناتيجە كورسەتكەن مەملەكەتتىك قىزمەتشى جۇمىستىڭ اۋىرلىعى، جاۋاپكەرشىلىك دەڭگەيى مەن ماقساتتى ينديكاتورلارعا قولجەتكىزۋ ۇلەسى ءۇشىن بونۋستار الادى»، - دەدى س. احمەتجانوۆ.

ايتا كەتەيىك، زاڭناما اياسىندا العاش رەت مەملەكەتتىك قىزمەتكە قابىلداۋ ءۇش ساتىلى كونكۋرستىق ىرىكتەۋ ارقىلى جۇزەگە اساتىن بولادى. ءبىرىنشى كەزەڭدە ۇمىتكەرلەر زاڭداردى ءبىلۋ مەن قۇزىرەتتىلىك بويىنشا تەستىلەۋدەن وتەدى. ەكىنشى كەزەڭدە اگەنتتىك ارنايى سۇحباتتاسۋ ارقىلى ۇمىتكەردىڭ جەكە قاسيەتتەرىن تەكسەرەدى. ءۇشىنشى كەزەڭدە مەملەكەتتىك ورگان كانديداتتىڭ كاسىبي ءبىلىمىن، بىلىكتىلىگىن ايقىندايتىن بولادى. كونكۋرستان ءساتتى وتكەندەر ءۇشىن تالىمگەرلەر بەلگىلەنە وتىرىپ، ۇشتەن التى ايعا دەيىنگى ارالىقتا سىناق مەرزىمى بەلگىلەنەدى. سىناق مەرزىمىنەن وتە الماعاندار اگەنتتىكتىڭ كەلىسىمىمەن جۇمىستان بوساتىلۋى ءتيىس.

اۆتور: رۋسلان عابباسوۆ