بالعىنبەك يماشيەۆ ايتىسپەن قوش ايتىستى

استانا. قازاقپارات - بىلتىرعى جىلى «التىن دومبىرانىڭ» يەسى اتانعان ايتىسكەر اقىن بالعىنبەك يماشيەۆ ايتىستان كەتەتىنىن مالىمدەدى.

كەشە الماتى وبلىسىنىڭ ورتالىعى تالدىقورعان قالاسىندا XIX عاسىرداعى جەتىسۋ اقىندارىنىڭ التىن دىڭگەگى، ايتىسكەر اقىن ءسۇيىنباي ارون ۇلىنىڭ 200 جىلدىق مەرەيتويىنا ارنالعان حالىقارالىق اقىندار ايتىسى وتكەن بولاتىن. سول ايتىسقا قاتىسقان تانىمال اقىن بالعىنبەك يماشيەۆ وسىدان كەيىن ايتىسقا شىعۋدى دوعاراتىنىن ايتتى.

اينۇر تۇرسىنبايەۆامەن ايتىسى كەزىندە اقىن ايگىلى «توي جىرى» ءانىنىڭ ماقامىنا سالىپ، ءوز ويىن بىلاي اياقتادى.

تالدىقورعاندا ءتاتتى كۇندەر، ءتاتتى كۇندەر!

بۇل ايتىسقا شات كۇلىڭدەر، شات كۇلىڭدەر.

وسىمەن مەن كەتەمىن پەنسياعا،

بالعىنبەكتىڭ سوڭعى ايتىسى دەپ بىلىڭدەر.

اقىننىڭ ونەردە بىرگە كەلە جاتقان زامانداسى ايبەك قاليەۆ دوسىنىڭ مۇنداي مالىمدەسىن ەستىگەن كەزدە:

نەمەنەڭە جەتىستىڭ، بالا باتىر،

شال اقىندار ازايىپ بۇل ايتىستا،

شالا اقىندار كوبەيىپ بارا جاتىر.

بالعىن دوسىم قوشتاسىپ ايتىسپەنەن،

ايبەك كەلىپ ەندىگى جاعادا تۇر، - دەپ بالعىنبەكتىڭ ايتىستان كەتكەنىن قيمايتىنىن ءبىلدىردى.

ايتا كەتەيىك، «مەنىڭ ءپىرىم - ءسۇيىنباي» اتتى حالىقارالىق ايتىستىڭ باس جۇلدەسىن جەرگىلىكتى اقىن جانداربەك بۇلعاقوۆ جەڭىپ الدى. وعان جەڭىل اۆتوكولىكتىڭ كىلتى تاپسىرىلدى. ال ءبىرىنشى ورىن استانالىق سىرىم اۋەزحانعا (1 ميلليون تەڭگە)، ەكىنشى ورىن اينۇر تۇرسىنبايەۆاعا (700 مىڭ تەڭگە)، قوس ءۇشىنشى ورىن اياگوز سەرىك قىزى مەن قىتاي ەلىنەن كەلگەن ارزىگۇل قايىمبەك قىزىنا (ءارقايسىسىنا 500 مىڭ تەڭگەدەن) بۇيىردى.

Baq.kz