ازاماتتارعا اقپارات بەرمەگەن مەملەكەتتىك ورگان قىزمەتكەرلەرى جاۋاپقا تارتىلاتىن بولادى
زاڭنىڭ ماقساتى اركىمنىڭ زاڭمەن تىيىم سالىنباعان كەز كەلگەن تاسىلمەن اقپاراتتى ەركىن الۋ جانە تاراتۋ جونىندەگى كونستيتۋتسيالىق قۇقىقعىن ىسكە اسىرۋ بولىپ تابىلادى. سونىمەن قاتار زاڭ جوباسى ەلباسىنىڭ بەس ينستيتۋتسيونالدىق رەفورماسى اياسىنداعى «اشىق مەملەكەتتى قالىپتاستىرۋ» اتتى بەسىنشى باعىتىن جۇزەگە اسىرىپ، بۇل رەتتە «100 ناقتى قادام» ۇلت جوسپارىنىڭ 95-96- قادامدارىن قامتۋدى كوزدەيدى.
بۇل رەتتە زاڭ ارقىلى اقپاراتتى اۋىزشا دا، جازباشا دا بەرۋ ءتارتىبى رەگلامەنتتەلىپ، سۇراۋ سالۋلار بويىنشا اقپاراتتى بەرۋدەن باس تارتۋ ءۇشىن نەگىزدەر ايقىندالادى. اقپاراتقا قول جەتكىزۋ قۇقىعىن زاڭسىز شەكتەۋگە شاعىم جاساۋ ءتارتىبى دە ناقتىلانادى. ايتا كەتەرلىگى، زاڭ جوباسى اۆتورلارىنىڭ ءبىرى ءماجىلىس دەپۋتاتى ماۋلەن اشىمبايەۆتىڭ ايتۋىنشا، اقپاراتتى ۇسىنۋدان باس تارتقان نەمەسە قاساقانا جالعان اقپارات بەرگەن تۇلعالارعا جاۋاپكەرشىلىك تە قارالادى.
«ياعني، جەكە نەمەسە زاڭدى تۇلعا قانداي دا ءبىر مەملەكەتتىك ورگانعا اقپارات الۋ ءۇشىن سۇراۋ سالسا، ال اقپارات وعان بەرىلمەسە، سونىمەن بىرگە اقپارات بەرمەۋگە ەش نەگىزدەر كورسەتىلمەسە، نە بولماسا سۇراۋ سالىنعان اقپارات بويىنشا جالعان اقپارات بەرىلسە، ونداي تۇلعا جاۋاپكەرشىلىككە تارتىلادى. وعان 30-100 ايلىق ەسەپتىك كورسەتكىشكە دەيىن ايىپپۇل قاراستىرىلىپ وتىر. ال بۇنداي ارەكەت ءبىر جىل ىشىندە قايتالانسا، جاۋاپكەرشىلىك ءۇشىن 50 دەن 200 ا ە ك كوزدەلەدى»، - دەيدى م. اشىمبايەۆ.
ونىڭ ايتۋىنشا، اتالعان نورما مەملەكەتتىك قۇرىلىمداردى عانا ەمەس، بيۋدجەتتىڭ قاراجاتىن الاتىن ءارى ازاماتتارىمىز ءۇشىن قاجەتتى اقپاراتتار يەلەنەتىن جەكە بيزنەس سۋبەكتىلەرىن دە قامتيدى.
بۇدان بولەك، زاڭ اياسىندا اقپاراتقا قول جەتكىزۋ تاسىلدەرىن كەڭەيتۋ ماسەلەلەرى دە قامتىلعان. ماسەلەن، ق ر پارلامەنتى پالاتالارىنىڭ بىرلەسكەن وتىرىسىن قوسا العاندا، پارلامەنتتىڭ جالپى وتىرىستارىن، وبلىستاردىڭ، رەسپۋبليكالىق ماڭىزى بار قالالارىنىڭ، استانانىڭ جەرگىلىكتى وكىلدى ورگاندارىنىڭ اشىق وتىرىستارىن ونلاين-ترانسلياتسيالاۋ، سونىمەن قاتار جىل قورىتىندىلارى بويىنشا وتكىزىلەتىن مەملەكەتتىك ورگانداردىڭ القالارىنا ينتەرنەت-رەسۋرستار ارقىلى اقپاراتقا قولجەتكىزۋ ۇسىنىلادى.
بۇدان بولەك، مەملەكەت باسشىسىنىڭ تاپسىرماسىنا سايكەس، جەرگىلىكتى اتقارۋشى ورگاندار باسشىلارىنىڭ، اكىمدەر مەن ۇلتتىق ۋنيۆەرسيتەت رەكتورلارىنىڭ ەسەپتىك كەزدەسۋلەرىن وتكىزۋ مىندەتتەلەدى.
پارلامەنت قابىلداعان زاڭ مەملەكەت باسشىسىنىڭ قول قويۋىنا جولدانادى.
اۆتور: قانات مامەتقازى ۇلى
