ونەرتاپقىشتار جۇمىسباستى اتا-انالارعا الەمدە تەڭدەسى جوق قۇرىلعى ۇسىنباق
ول ءۇشىن ينتەرنەت، GPS، ءتىپتى موبيلدى بايلانىس تا كەرەك ەمەس. قازاقستاندىق ونەرتاپقىشتار جاقىندا جۇمىسباستى اتا-انالاردىڭ قولدانىسىنا الەمدە تەڭدەسى جوق قۇرىلعى ۇسىنباق. جاس انا ايگەرىم قونىسپايەۆا جاقىندا وسى فيلمنىڭ شىنايى ومىردەگى كەيىپكەرىنە اينالا جازدادى. ونىڭ 8 جاستاعى ۇلى مەكتەپتەن كەيىن جوعالىپ كەتتى.
ايگەرىم قونىسپايەۆا، قالا تۇرعىنى:
- بالام بىلتىر ءوزى ساباقتان كەتىپ قالىپتى. اۆتوبۋس توسساق، جوق. مەكتەپتە دە جوق. ەندى ايالداماعا شىقسام، ءوزى كەلە جاتىر ەكەن. قازىرگى اتا-انالاردىڭ ۋاقىتتارى جوق. جۇمىستا ءجۇرىپ، ۋاقىتتارى بولماعاندا وسىنداي قۇرىلعى كەرەك.
اعايىندى رامازان مەن تورعىن قالا شەتىندە تۇرعاندىقتان، ورتالىقتاعى مەكتەپكە قوعامدىق كولىكپەن قاتىنايدى. ولار ساباقتان ۇيىنە جەتكەنشە، ايگەرىمدە مازا جوق. ويتپەگەندە شە؟! بيىلدىڭ وزىندە ەلىمىزدە 429 بالا جوعالعان. باس پروكۋراتۋرا بەرگەن دەرەكتەرگە سەنسەك، ولاردىڭ 400 ى تابىلسا، 38 ءبۇلدىرشىن ءالى حابار-وشارسىز. IT سالاسىنىڭ مامانى ەۆگەني شەرباتوۆ اتا-انالار ءۇشىن موبيلدى ترەكەر ويلاپ تاپتى. ول ارقىلى بالالاردىڭ قايدا جۇرگەنىن قاداعالاپ وتىرۋعا بولادى.
ەۆگەني شەرباتوۆ، «مانگۋست» جوباسىنىڭ اۆتورى:
- ءبىز الەمدىك نارىقتان بالانىڭ قايدا جۇرگەنىن وڭاي تابۋعا كومەكتەسەتىن، سونبەيتىن، سىنبايتىن قۇرىلعى ىزدەدىك. تاپپادىق. ودان سوڭ ونى ءوزىمىز جاسايمىز دەپ شەشتىك.
كوپ ادامنىڭ قيالىنداعى قۇرالدى ومىرگە اكەلۋ ءۇشىن 3 جىلداي ۋاقىت كەتتى. يدەيا اۆتورلارى ەڭ الدىمەن ونىڭ بەرىكتىگىنە دەن قويعان. ناتيجەسىندە ينتەرنەت پەن GPS كە باعىنبايتىن، سۋ كىرمەيتىن جانە قۋاتى ءبىر ايعا دەيىن جەتەتىن «مانگۋست» پايدا بولدى.
ەۆگەني شەرباتوۆ، «مانگۋست» جوباسىنىڭ اۆتورى:
- ءبىز زاماناۋي تەحنولوگيالاردى پايدالاندىق. ول ەلەكتر ەنەرگيانى بەي-بەرەكەت جۇمسامايدى. ماسەلەن، بالا سىنىپتا وتىرعانىن سەزسە، «مانگۋست» قۋاتىن ۇنەمدەيدى.
مانگۋست حالىقارالىق hnationTe بايقاۋىنا قاتىسىپ، 345 ونەرتابىستىڭ ۇزدىك جەتىلىگىنە ەندى.
كاميللا قاسىمبەكوۆا، تەحنولوگيالىق دامۋ جونىندەگى ۇلتتىق اگەنتتىگىنىڭ دامۋ ورتالىعىنىڭ باسقارۋشى ديرەكتورى:
- بۇل جوبا بىرنەشە كەزەڭنەن ءوتتى. العاشىندا 345-تەن 80 جوبانى، ونىڭ ىشىنەن تاعى 40 ۇزدىكتى تاڭدادىق. ال ءقازىر ەڭ وتكىر سىننان وتكەن 7 ونەرتابىس اۆتورلارى ا ق ش- تا بىلىمدەرىن شىڭداپ، جوبالارىن جەتىلدىرىپ جاتىر.
«مانگۋستىڭ» اۆتورلارى ءۇشىن ەڭ جوعارعى ماراپات - سابيلەردىڭ اماندىعى، اتا-انانىڭ رازىلىعى. ويتكەنى قايعىلى جاعدايدى ونەرتاپقىشتاردىڭ ءبىرى ءوز باسىنان وتكىزگەن. سوندىقتان تاياۋ ارادا ول قولدانىسقا شىعادى.
