س. احمەتوۆتىڭ ءىسى بويىنشا جالعان مالىمدەمە بەرگەنى ءۇشىن كۋاگەردى جازالاۋى مۇمكىن

قاراعاندى. قازاقپارات - قاراعاندى وبلىسى سوتىندا سەرىك احمەتوۆ جانە باسقا دا بۇرىنعى جوعارى لاۋازىمدى شەنەۋنىكتەردىڭ قىلمىستىق ءىسى بويىنشا كۋاگەرلەردى تىڭداۋ جالعاسۋدا. سوت تالقىلاۋى اياسىندا ءىس بويىنشا كۋاگەرلەرگە قىسىم كورسەتكەنى ءۇشىن اتىنا ايىپ تاعىلعان تەرگەۋشى ءسوز سويلەدى.

 ەسكە سالساق، بۇعان دەيىن بۇرىنعى پرەمەر-مينيستر سەرىك احمەتوۆكە قاتىستى قىلمىستىق ءىس ەپيزودتارىنىڭ ءبىرى بويىنشا كۋاگەر انار ماقسۇتوۆا سوتقا دەيىنگى تەرگەۋ بارىسىندا ودان الىنعان ايعاقتاردان باس تارتقان بولاتىن، سوت وتىرىسى ۋاقىتىندا مۇنى ول جاۋاپ الۋ كەزىندە ونى قورقىتىپ، قىسىم جاسالعانىمەن تۇسىندىرگەن.

وسى فاكتى بويىنشا ايعاقتى دالەل بەرۋ ءۇشىن وسى جاۋاپ الۋدى جۇرگىزگەن قاراعاندى وبلىسى سىبايلاس جەمقورلىققا قارسى دەپارتامەنتىنىڭ اسا ماڭىزدى ءىس بويىنشا تەرگەۋشىسى بۇلان راحىمجانوۆ شاقىرتىلدى.

«الدىن الا تەرگەۋ بارىسىندا كۋاگەر رەتىندە ماقسۇتوۆادان جاۋاپ الۋ قاجەتتىلىگى تۋىندادى، مەن ماقسۇتوۆا مەن ونىڭ ادۆوكاتى جۋراۆلەۆكە قوڭىراۋ شالدىم. ولارعا قولايلى ۋاقىتتى كەلىسىپ، ولار 28 -جەلتوقساندا ساعات 13.30 دا دەپارتامەنت عيماراتىنا كەلدى. ولاردىڭ 3 -قاباتتا ورنالاسقان ءوزىمنىڭ قىزمەتتىك كابينەتىمە ەرتىپ كەلدىم. مەن، ادۆوكات جۋراۆلەۆ، ماقسۇتوۆادان باسقا كابينەتتە ەشكىم بولعان جوق. ماقسۇتوۆادان جاۋاپ الۋ بارىسىندا ول ماجبۇرلەۋسىز ءوز ەركىمەن قويىلعان سۇراقتاردىڭ بارلىعىنا جاۋاپ بەردى. بۇدان باسقا، جاۋاپ الۋدىڭ الدىندا ماقسۇتوۆاعا كۋاگەردىڭ قۇقىقتارى مەن مىندەتتەرى (ونىڭ ىشىندە تەرگەۋشى، پروكۋرور، سوتتىڭ ارەكەتىنە شاعىمدانۋعا قاتىستى) ءتۇسىندىرىلدى. سونداي-اق، وعان كورىنەۋ جالعان ايعاق بەرگەنى جانە ايعاق بەرۋدەن باس تارتقانى ءۇشىن قىلمىستىق جاۋاپكەرشىلىك كوزدەلگەنى تۋرالى ەسكەرتىلگەن»، - دەپ حابارلادى ب. راحىمبەكوۆ.

تالقىلاۋ بارىسىندا جاۋاپ الىنعاننان كەيىن انار ماقسۇتوۆا مەن ونىڭ ادۆوكاتى قول قويعان حاتتاما جاسالعانى انىقتالدى.

وتىرىسقا قاتىسقان انار ماقسۇتوۆا ءوزىن قاماپ ۇستادى دەپ وتىرعان جەرتولەنى سيپاتتاپ بەرە المادى. ول ەسىندە قالماعانىن ايتىپ وتىر، دەگەنمەن تەرگەۋشىنىڭ ءسوزىن جوققا شىعاردى. سونداي-اق، ا. ماقسۇتوۆا پروكۋراتۋراعا بۇرىن نەلىكتەن شاعىمدانباعانىن، قىسىم كورسەتىلگەنى جونىندە تەك سوت بارىسىندا ءمالىم ەتكەنى تۋرالى دا ايتپادى.

«جاۋاپ الۋ كەزىندە ماقسۇتوۆاعا ەشقانداي قىسىم كورسەتىلگەن جوق، 28 -جەلتوقسان كۇنى جاۋاپ الۋ جۇرگىزىلدى، ول ۆيدەوعا تۇسىرىلگەن جوق. جاۋاپ الۋ قىلمىستىق-پروتسەستىك كودەكسكە سايكەس جۇرگىزىلدى. جاۋاپ الۋ جۇرگىزىلگەن ورىن حاتتامادا كورسەتىلگەن، ەشكىم دە ماقسۇتوۆانى جەرتولەگە تۇسىرگەن جوق، جاۋاپ الۋ پروتسەسىنە ەشكىم دە ارالاسپادى. سونىمەن قاتار، ماقسۇتوۆانىڭ جاۋابى شىندىققا جاناسپايتىنىن، ول وتىرىك ايتىپ وتىرعانىن مالىمدەگىم كەلەدى. وسىعان بايلانىستى ونى قىلمىستىق جاۋاپكەرشىلىككە تارتۋ تۋرالى ارىز ءتۇسىرۋ قۇقىعىن ساقتاپ قالامىن»، - دەدى ب. راحىمجانوۆ.

وسىدان سوڭ ايىپتاۋشى تاراپ سوت ءتوراعاسىنان كورىنەۋ جالعان ءسوز جەتكىزگەنى ءۇشىن ماقسۇتوۆاعا قاتىستى قاۋلى قابىلداپ، ءتيىستى شارا قولدانۋ ءۇشىن قاراعاندى وبلىسىنىڭ پروكۋراتۋراسىنا جولداۋدى سۇرادى.

وسى ماسەلە بويىنشا تەرگەۋ جالعاسىپ جاتىر.