ءوزىن «پايعامبارمىن» دەپ جاريالاعان ازامات جىندىحانادا ەسەپتە تۇرعانىن ەستىپ اشۋلاندى
بۇل تۋرالى NUR. KZ تىلشىسىنە ارىزدانۋشى نۇرالى امىراليەۆتىڭ ءوزى مالىمدەدى.
51 جاستاعى تۇركىستان تۋماسى جاقىن كۇندەرى مەرزىمى وتكەن كولىك جۇرگىزۋ كۋالىگىن اۋىستىرۋ ءۇشىن پوليتسيا بولىمشەسىنە كەلىپ، بوس قايتقان. سەبەبى، ءتارتىپ ساقشىلارى ونىڭ جۇيكە اۋرۋلار اۋرۋحاناسىندا ەسەپتە تۇراتىنىن ايتىپ، قۇجاتسىز شىعارىپ سالىپتى.
«مەن ەشقاشان اۋرۋحاناعا باس سۇعىپ ەمدەلگەن ەمەسپىن. بۇلار قايدان شىعاردى مەنىڭ جىندى ەكەنىمدى. «ەسى اۋىسقان» دەپ مەنى جىندىحانا تىزىمىنە قوسىپ قويىپتى. ءتىپتى كۇن سايىن تۇركىستان قالالىق جۇيكە اۋرۋلار اۋرۋحاناسىنان دارىگەرلەر كەلىپ، «ءسىز ناۋقاسسىز، اۋرۋحاناعا جاتىڭىز، ەمدەيمىز» دەپ مازامدى الادى. ماعان ءتىل تيگىزگەندەردىڭ كۇناسىن جۋىپ- شايۋدىڭ قۇنى قازاقتىڭ 2 ميلليون تەڭگەسى. وڭتۇستىك قازاقستان وبلىسى دارىگەرلەرىنىڭ كۇناسى 100 ميللوننان اسىپ كەتتى. سوندىقتان ولاردى سوتقا بەرەمىن»، دەيدى نۇرالى امىراليەۆ.
ءوزىنىڭ اللا ۇكىمىمەن پايعامبار بولعانىن جاريا ەتكەن نۇرالى امىراليەۆ قازىر قۇران اۋدارىپ، ورازا تۇتىپ جۇرگەنىن ايتادى. كولىك جۇرگىزۋ كۋالىگى كاسىپ ءۇشىن كەرەك ەكەن. سەبەبى، تۇراقتى جۇمىسى بولماعان سوڭ تاكسيلەتىپ ءناپاقا تابۋدى جوسپارلاعانىن ايتادى. ءتىپتى ول حالىق اراسىندا وزىنە سەنەتىن ازاماتتاردىڭ كوبەيىپ كەلە جاتقانىن العا تارتتى.
«شىن نيەتىمەن كومەك سۇراعاننىڭ بارلىعىنا قول ۇشىمدى سوزامىن. ماعان كوزى كورمەي، جۇرە الماي قالعان ازاماتتار كەلدى. سولارعا ءبىر رەت دەم سالىپ بەردىم. بارلىعى قۇلان تازا ايىعىپ كەتتى. ءتىپتى دارىگەرلەر وتا جاساۋ كەرەك دەگەن اۋرۋلاردى جازعانىم بار. ءبىراق ەشقايسىنان اقشا المايمىن. ەڭ باستىسى مەنىڭ پايعامبار ەكەنىمدى مويىنداپ، الدىما كەلىپ كومەك سۇراسا بولدى»، دەيدى.
NUR. KZ
