بوگەنباي باتىردىڭ دۋلىعاسى ساتىلادى

استانا. قازاقپارات - قانجىعالى بوگەنبايدىڭ ۇرپاقتارى باتىردىڭ دۋلىعاسىن ۇزاق ۋاقىتتان بەرى ساقتاپ كەلەدى، الايدا ولار ونى ەلىمىزدەگى مۇراجايلاردىڭ بىرىنە ساتۋدى ۇيعارعان.

بۇل تۋرالى  Тengrinews.kz تىلشىسىنە اقمولا وبلىسىنىڭ تۇرعىنى، اتى اڭىزعا اينالعان باتىردىڭ ۇرپاعى جاباي كەنجالين ايتىپ بەردى. 

 جاباي كەنجالين اقمولا وبلىسى ەرەيمەنتاۋ اۋدانى مالتابار اۋىلىندا تۇرادى. اۋىلداستارىنىڭ بارلىعى وتباسىلىق جادىگەردەن حاباردار. «بۇل دۋلىعا اكەم باتىرقوجا ونى ساقتاپ قويۋ ءۇشىن بەرگەننەن كەيىن مەنىڭ قولىما ءتۇستى. ءبىز ءۇش اعايىندىمىز، مەن ورتانشىمىن. مەن 8- بۋىن ارقىلى بوگەنبايدىڭ تىكەلەي ۇرپاعى بولىپ كەلەمىن. ال دۋلىعا ۇرپاقتان- ۇرپاققا بەرىلىپ، ەشقاشان جوعالماعان»، - دەدى ول. 

 كەنجاليننىڭ ايتۋىنشا، 1941 - جىلى اكەسىنىڭ تۋعان اعاسى مايدانعا اتتانعان. الايدا ول سوعىستان ۇيىنە ورالماعان، حابارسىز كەتىپتى. ءبىراق ونىڭ مايدانعا اتتانباس بۇرىن دۋلىعانى ەرەيمەنتاۋ شاحتالارىنىڭ بىرىنە بالتامەن جانە بەلدىكپەن بىرگە تىعىپ كەتكەنى بەلگىلى. قۇندى دۇنيەلەر ۇزاق ۋاقىت بويى وسىلاي ساقتالعان، سەبەبى ولاردىڭ وتباسى سول زاماندا داۋلەتتى دەپ ەسەپتەلىپتى. كەيىن بالتا مەن بەلدىك الماتىنىڭ مۇراجايىنا بەرىلدى، ال دۋلىعا جاباي كەنجاليننىڭ ۇيىندە ساقتاۋلى.

جاباي كەنجالين قازىر ەرەيمەنتاۋ تەمىرجول ستانسياسىندا ەڭبەك ەتەدى. ول جانە ونىڭ تۋىستارى دۋلىعانى ەلىمىزدەگى مۇراجايلاردىڭ بىرىنە تابىستاۋعا دايىن، الايدا تەگىن ەمەس. بۇعان دەيىن ءتۇرلى قالانىڭ مۇراجايلارىنان ماماندار بارىپ، ساراپتامانىڭ جاسالاتىنىن ايتقان، ءبىراق بايلانىس ءۇزىلىپتى. «مەن جالعىز تۇرمايمىن، سوندىقتان دۋلىعاعا قانداي باعانى ۇسىنۋ كەرەگىن بىلمەيمىن. سونىمەن قاتار، مەنىڭ اعام مەن ءىنىم بار، ءبىز بولىسەمىز. قازىر ناقتى باعاسىن ايتا المايمىن. باۋىرلارىممەن باعا ماسەلەسىن تالقىلادىق، ولار كورەمىز دەپ جاۋاپ بەردى»، - دەيدى ول جوسپارلارى تۋرالى. 

 سونىمەن قاتار، ەرەيمەنتاۋ قالاسىنداعى تاريحي- ولكەتانۋ مۇراجايىنىڭ ماماندارى دۋلىعانىڭ ءتۇپنۇسقالىلىعىنا قاتىستى پىكىر ايتتى. «مۇرانى ساقتاۋشى دۋلىعانىڭ شىققان مەرزىمىن انىقتاۋ ءۇشىن ساراپتاما جاساتقىسى كەلگەن، ءبىراق ول تىم قىمبات. ءبىراق ءبىز دۋلىعانىڭ بوگەنبايدىكى ەكەنىنە سەنەمىز: 300 جىل ءوتتى، ال قازاقتار ىرىمشىل حالىق، ونداي زاتتاردى ساقتايدى. سوندىقتان ول ءتۇپنۇسقا دەپ ويلايمىز»، - دەدى مۇراجايداعىلار. 

 قانجىعالى بوگەنباي باتىر - قازاقستان تاريحىنداعى ەڭ داڭقتى قولباسشىلاردىڭ ءبىرى، ول XVIII  عاسىردا ءومىر سۇرگەن. بوگەنباي ەشقاشان جەڭىلىپ كورمەگەن باتىر رەتىندە تاريحتا قالدى. وڭتۇستىك قازاقستان وبلىسىنىڭ تۋماسى، دەرەككوزدەرىنە سەنسەك، باتىر اقمولا وبلىسى ەرەيمەنتاۋ اۋدانىندا ات ۇستىندە وتىرىپ اجالىمەن قاۋىشقان. 

 kaz.tengrinews.kz