ارابتارعا ساتىلماق بولعان قۇستار ەركىندىككە ۇشىرىلدى

 شىمكەنت. قازاقپارات - وڭتۇستىك قازاقستان وبلىسىندا كونتراباندالىق ماقساتتا اۋلانعان يتەلگىلەر قۇتقارىلدى. شىمكەنت اۋەجايىندا ۇستالعان قۇستاردىڭ قۇنى ءبىر ميلليون دوللارعا باعالانىپ وتىر.

سۇعاناقتار زاڭسىز اۋلانعان، تابيعاتتا سيرەك كەزدەسەتىن 24 قۇستى كادىمگى تاۋار سەكىلدى شابادانعا سالىپ، شەكارادان الىپ وتپەك بولعان.

قىمبات جۇكتىڭ يەسى ونى اراب ەلىندە تۇراتىن باي- باعلاندارعا ساتقىسى كەلگەنىن مويىندادى. الايدا اڭشىلاردىڭ ارامزا جوسپارىن كەدەن قىزمەتكەرلەرى مەن شەكاراشىلار بۇزدى. سيرەك كەزدەسەتىندىكتەن، يتەلگى قازاقستاننىڭ « قىزىل كىتابىنا» ەنگەن.

 ۇستالعاندار اۋەجايدان وتەردە قۇستاردى دارىمەن ۇيىقتاتىپ تاستاپتى. الايدا جۇكتى ۇشاققا تيەۋ بارىسىندا ويانىپ كەتىپ، شۋ شىعارعان. قىلمىستىق ءىس قوزعالعان ۋاقىتتا بۇل قۇستار شىمكەنت زووباعىندا ارنايى ۋاقىتشا ساقتاۋدا بولدى. وكىنىشكە وراي، بۇگىندە قۇستاردىڭ تورتەۋى ءولىپ قالىپتى. قالعاندارىن ماماندار تاۋلى جەرگە اپارىپ، ەركىندىككە ۇشىردى، دەپ حابارلايدى otyrar.kz.