ارال تەڭىزى تابانىندا پايدا بولاتىن تۇز ارالاس شاڭدى داۋىلدار عارىشتان دا كورىنەدى - ا. ايىمبەتوۆ
بۇل تۋرالى بۇگىن الماتىدا «يونوسفەرا ينستيتۋتى» ەنشىلەس جاۋاپكەرشىلىگى شەكتەۋلى سەرىكتەستىگىندە ءوتىپ جاتقان حالىقارالىق «الدىڭعى قاتارلى عارىشتىق زەرتتەۋلەر مەن تەحنولوگيالار» عىلىمي- تاجىريبەلىك سەمينار- وتىرىسى بارىسىندا قازاقستاننىڭ ءۇشىنشى عارىشكەر- ۇشقىشى، حالىق قاھارمانى ايدىن ايىمبەتوۆ مالىمدەدى.
«عارىشتان، ياعني 400 شاقىرىمدىق بيىكتىكتەن ارال تەڭىزىنىڭ تابانىندا پايدا بولاتىن تۇز ارالاس شاڭدى داۋىلدى ءجاي كوزبەن دە كورۋگە بولادى. ونىڭ تارالۋ راديۋسى 10 شاقىرىمنان بىرنەشە جۇزدەگەن شاقىرىمعا جەتەدى. سونىمەن قاتار، عارىشتان شاڭدى داۋىلدار عانا ەمەس، ورماندى القاپتاردا بولاتىن ورتتەر دە عارىشتان جەر انانىڭ ادەمى ءجۇزىن وسقىلاعان شەشەك اۋرۋى سەكىلدى كورىنىپ جاتادى»، - دەدى ا. ايىمبەتوۆ.
ايتا كەتەلىك، قازاقستاندىق عارىشكەر ۇستىمىزدەگى جىلدىڭ 2-12- قىركۇيەگى ارالىعىندا حالىقارالىق عارىش ستانساسىندا ق ر اەروعارىش كوميتەتىنىڭ ۇلتتىق عارىشتىق زەرتتەۋلەر جانە تەحنولوگيالار ورتالىعى ازىرلەگەن بەسىنشى عىلىمي باعدارلامانى جۇزەگە اسىرعان بولاتىن. سول باعدارلاما اياسىندا ايدىن ايىمبەتوۆ ارال تەڭىزى، ەلىمىزدىڭ تاۋلارىنداعى مۇزدىقتار جانە كاسپي تەڭىزى ايماعىنا گەوفيزيكالىق مونيتورينگ جۇرگىزدى. وسى ماقساتتا جاسالعان عىلىمي تاجىريبەلەردىڭ قورىتىندىسى ۇلتتىق عارىشتىق زەرتتەۋلەر جانە تەحنولوگيالار ورتالىعىندا زەرتتەلەتىن بولادى.
اۆتور: جاپپاربەرگەن ايبوتا
