بولاشاعى ءبىرتۇتاس ەل: ارام پيعىلدارعا ىشىمىزدەگى بىرلىكتى قارسى قويۋعا ءتيىسپىز - دەپۋتات باقىتبەك سماعۇل
بۇل پىكىردى جاقىندا وتكەن «ماڭگىلىك ەل - بولاشاعى ءبىرتۇتاس ۇلت» رەسپۋبليكالىق پاتريوتتار فورۋمىنىڭ قاتىسۋشىلارى دا بەكەمدەي ءتۇستى. وسى ورايدا بۇل فورۋمعا قاتىسىپ، وسكەلەڭ ۇرپاقتى وتانسۇيگىشتىككە شاقىرعان ق ر پارلامەنتى ءماجىلىسىنىڭ دەپۋتاتى، اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ ءتوراعاسى باقىتبەك سماعۇلمەن جۇزدەسىپ، ەلىمىزدەگى بەيبىتشىلىك قۇندىلىقتارى تاقىرىبىندا پىكىرىن بىلدىك.
«قانداي ۋاقىتتا بولماسىن، جالپى ءبىزدىڭ قوعامىمىز مايدان ورتاسىنان ورالعان، سوعىستىڭ تاۋقىمەتىن تارتقان ادامداردىڭ سوزىنە قۇلاق تۇرگەنى ءجون. ءبىز سوعىس وتىنىڭ تۇتانۋىن قالامايمىز، كەرىسىنشە، بەيبىت ءومىردىڭ قۇنى مەن قادىرىن جاقسى تۇسىنەمىز. اتاپ ايتقاندا، قارۋلى قاقتىعىس ەل كەلەشەگى ءۇشىن قاۋىپ- قاتەر ەكەنىن بىلەمىز. قازاقستان مەن سوعىس ۇعىمدارى ەشقاشان قاتار تۇرماسىن. سوندىقتان دا بۇگىندە الەم ۇشىنىپ تۇر، ادىلەتتىلىكتىلىكتى ۋاقىتىندا ورناتۋعا قۇلىقسىزدىقتان، ۋاقىت ءار ەلدى ءارقالاي سىناپ جاتىر. دامۋشى ەلدەرگە جاسالىپ جاتقان ۇستەمدىك، قىساستىق، ادىلەتتىلىكتى بەلدەن باسىپ، اگرەسسيۆتى ەكونوميكالىق، قارجىلىق، ينۆەستيتسيالىق قۇرساۋلار، كومپانياارالىق قىسىمدار، الپاۋىت ەلدەر داعدىعا اينالدىرعان ينتەرۆەنتسيالار مەن ءدىني كەمسىتۋلەر، سونداي- اق قىسقاسى وتارشىلدىقتىڭ جاڭا تۇرلەرى ءار ەلدىڭ ەسىگىنەن سىعالاۋدى قويىپ، تورىنە قونجيىپ وتىرىپ جاتىر. قويناۋى قازىناعا تولى ءوز بايلىعىڭدى وزىڭە بازارلاتقىسى كەلمەيتىن، ءوز ءۇيىڭنىڭ تارتىبىنە وزىنە ۇناعان وزگەرىستەردى ەنگىزە سالعىسى كەلەتىن وكتەم پيعىلدار ءورشىپ تۇر. ءورتتىڭ ءبارىن جالعىز ءوزىڭ وشىرە الاسىڭ با؟ ارانداتۋشى كۇشتەر قازاقستانعا قارسى شىرپى تۇتاتا قويار سىلتاۋ تابا المايتىنىنا كىم كەپىل؟ !» ، - دەپ توقتالدى حالىق قالاۋلىسى.
باقىتبەك سماعۇلدىڭ سوزىنە قاراعاندا، ءدىنارالىق جانە ەتنوسارالىق تاتۋلىق، بەيبىتشىلىك پەن كەلىسىم، بولاشاعى باياندى ءھام ءبىرتۇتاس ۇلت وسى ءىستىڭ باسىندا جۇرگەن جالعىز ەلباسىعا عانا ەمەس، ەڭ اۋەلى مىنا اۋمالى- توكپەلى زاماندا جايلى جاتىپ، جاقسى تۇرۋدى تىلەيتىن قالىڭ جۇرتىمىزعا كەرەك. «ماڭگىلىك ەل» جولىندا ازعىرۋشىلار دا، اداستىرۋعا نيەتتى ارام پيعىلدار از كەزدەسپەيدى. سوندىقتان دا جامان نيەتتىلەرگە ىشىمىزدەگى بىرلىكتى قارسى قويۋعا ءتيىسپىز. جاساندىلىق پەن جالعاندىقتىڭ عۇمىرى ۇزاق ەمەس. اۋعان سوعىسىنىڭ اياقتالعانىنداي، دۇنيەننىڭ دەگبىرىن قاشىرعان داعدارىستار دا ءتامامدالادى. ولاردان كەلىسىم مەن دوستىق، قايرات پەن قايسارلىق، تاباندىلىق پەن ءتوزىم سەكىلدى ماڭگىلىك قۇندىلىقتارعا سۇيەنگەندەر عانا امان شىعادى. بۇگىنگى سىناق ەرتەڭگە ساباق بولعان ءجون.
«وسىنى قوعام تۇسىنسە ەكەن دەيمىز. بۇگىندە ۋىزداي ۇيىعان ىنتىماعىمىزدى جاراستىرىپ وتىرعان باستامانى اياعىنا دەيىن جەتكىزۋدىڭ باعىت باعدارىنىڭ بارلىعى بەلگىلى. بۇگىنگى تاڭدا ءبىز ىنتىماعىمىزدى جاراستىرۋىمىز كەرەك. قازاق ۇلتىنىڭ اياسىندا ۇيىستىرا بىلۋگە، ءبىز ءوزىمىزدىڭ تاريحىمىزدى، ءتىلىمىزدى، ءدىلىمىزدى، ءداستۇرلى ءدىنىمىزدى ساقتاۋعا، سونداي- اق وزگە ۇلتتىڭ وكىلدەرىن باۋىرىمىزعا تارتۋعا جاۋاپتى بىزدەرمىز. سوندا عانا ءبىز ۇلكەن تۇتاس ۇلتتىڭ ۇيىتقىسىنا اينالامىز. ويتكەنى، مەملەكەت قۇرۋشى بايىرعى قازاق حالقىنا قيىن كەزەڭدەردە تاعدىرىن قوسقان باۋىرلارىمىزدىڭ بارلىعى بىزگە ەتى جاقىن. سوندىقتان دا تاۋەلسىزدىك قۇرعالى ولاردىڭ دا ۇلكەن سۇبەلى ەڭبەكتەرى بار. ولار وسى جەردە تۋدى، وسى جەردى وتانىم دەپ سانايدى. وسى بەيبىتشىلىك پەن كەلىسىم اياسىنداعى يگى باستامالاردى جۇزەگە اسىرۋدىڭ باسىندا ەلىمىزدىڭ قارا كوزدەرى بولعانى ابزال. ۇلتتىڭ تۇتاستىعى قازاقتىڭ اۋىزبىرلىگىنەن بىلىنەدى. جەردىڭ تۇتاستىعى، ءدىننىڭ تۇتاستىعى، ءتىلدىڭ تۇتاستىعى سەكىلدى ماڭىزدى ماسەلەلەردى ەسكەرگەن جاعدايدا مەملەكەتتىك سانامىز قالىپتاسادى. ءتىل تۇتاستىعى - ءبىزدىڭ مەملەكەتكە دەگەن قۇرمەت!» ، - دەيدى دەپۋتات.
ب. سماعۇل جاقىندا ەلباسىنىڭ بىرىككەن ۇلتتار ۇيىمىندا التى تىلگە اۋدارتىپ، التى الاشتىڭ انا ءتىلىن التى قۇرلىققا پاش ەتىپ، ءبىرىنشى كەزەكتە بىرلىك پەن ىنتىماققا شاقىرعانىن ەسكە سالىپ ءوتتى. «مەملەكەت باسشىسىنىڭ قويعان ءاربىر ساياساتى سانالى تۇردەگى قارقىندى قادامدى قاجەت ەتەدى. اتاپ ايتقاندا، سانا قالىپتاستىرۋ ءۇشىن جەر اتاۋلارى وزدەرىنىڭ تاريحي نەگىزدەرىنە كەلىپ جاتىر. ءداستۇرلى ءدىنىمىز بار. وزگە اعىمداردىڭ جەتەگىندە ەمەس، ءبىز اتا- بابامىزدان كەلە جاتقان ءداستۇرلى دىنىمىزگە بەرىك بولۋىمىز كەرەك. سوندىقتان بۇگىنگى تاڭدا ەلباسىنىڭ باستاماسى جاۋ دا، داۋ دا جيناماي، ۇلى دالا توسىندە بەيبىت ءومىر ءسۇرۋ، اتا- بابالارىمىزدىڭ ارماندارىن باياندى ەتۋ. ەلىمىزدەگى وزگە ۇلت وكىلدەرىنىڭ بارلىعى ءبىزدىڭ باۋىرلارىمىز، ياعني ءبىرتۇتاس ۇلت دەپ ايتىپ وتىرعانىمىز وسى. بۇل ماسەلەنىڭ بارلىعىن ورىندى دەپ ويلايمىن جانە دۇرىس تۇسىنە ءبىلۋىمىز كەرەك. «ماڭگىلىك ەل» جولىندا بارلىعى باياندى بولسىن دەسەك، بىرلىك ماسەلەسىن تەرەڭ ۇعىنۋىمىزعا ءتيىسپىز. ءار ازامات ءوزىنىڭ ءومىرىن مەملەكەت مۇددەسىنە باعىشتاۋى كەرەك. ءبىز باۋىرلامىزدى يتەرمەي، وزىمىزگە جاقىن تارتىپ جاتىرمىز» ، - دەپ ءوز ويىمەن ءبولىستى حالىق قالاۋلىسى.
اۆتور: رۋسلان عابباسوۆ
