دەپۋتات ا. تۇرتايەۆ الەۋمەتتىك جەلىلەردەگى كەلەڭسىزدىكتەردى زەرتتەيتىن كوميسسيا قۇرۋدى ۇسىندى

استانا. قازاقپارات - الەۋمەتتىك جەلىدەگى كەلەڭسىزدىكتەردىڭ قوعامعا زيانىن زەرتتەيتىن ارنايى كوميسسيا قۇرىلۋى كەرەك.

بۇگىن پارلامەنت ءماجىلىسىنىڭ جالپى وتىرىسىندا دەپۋتات الماس تۇرتايەۆ وسى ماسەلەنى كوتەردى.

ءسوز اراسىندا دەپۋتات ەلىمىزدە ينتەرنەت پايدالانۋشىلار سانى جىل ساناپ ارتىپ وتىرعانىن العا تارتتى. ونىڭ ايتۋىنشا، وسىدان ون جىل بۇرىن ينتەرنەت پايدالانۋشىلار سانى حالىقتىڭ جالپى سانىنا ءتورت پايىزدى قۇراسا، بىلتىرعى مالىمەت بويىنشا 6-74 جاس ارالىعىنداعى پايدالانۋشىلار سانى 63,9 پايىزعا جەتكەن.

«ازاماتتارىمىز الەمدىك ينتەرنەتتى پايدالانۋ ۇدەرىسىنەن ەشكىمنەن كەش قالعان ەمەس، جەتەكشى الەۋمەتتىك جەلىلەردى پايدالانىپ ءارتۇرلى اقپاراتتارعا قول جەتكىزىپ وتىر. وسىلايشا، ازاماتتار ىشكى سۇرانىستارىنا قاتىستى بارلىق اقپاراتتاردى الەۋمەتتىك جەلىدەن الىپ، تاراتىپ، ءبولىسىپ جاتىر. بۇل جەلىنىڭ جاقسى جاعى. ال ونىڭ ەكىنشى جاعى بار. وكىنىشكە قاراي الەۋمەتتىك جەلىدە ەلدىڭ ۇرەيىن ۇشىراتىن اقپاراتتار تاراتىپ، ءتۇرلى زاڭ بۇزۋشىلىققا جول بەرەتىن، اسىرە انايى توپتار قۇرۋ، قوعامعا ءقاۋىپتى توپتار قۇرۋ فاكتىلەرى دە كەزدەسەدى»، - دەيدى دەپۋتات تۇرتايەۆ.

ونىڭ ايتۋىنشا، بۇل ماسەلە جاستاردىڭ دۇرىس تاربيە الۋىنا كەرى اسەرىن تيگىزەدى. سونداي جاعىمسىز ۇدەرىس سالدارىنان وزىنە-ءوزى قول جۇمساۋ، قۇقىق بۇزۋلارعا بارۋ سەكىلدى فاكتىلەر دە جيىلەگەن. بۇدان بولەك، دەپۋتات الەۋمەتتىك جەلىدە بوتەن ادامدى كەمسىتۋ، باسقانىڭ ابىرويىنا، قادىر-قاسيەتىنە ادەپسىز تۇردە نۇقسان كەلتىرۋ جيىلەپ كەتكەنىنە دە الاڭداۋشىلىق ءبىلدىردى.

«ون ءتورت جاسقا دەيىنگى جاسوسپىرىمدەر اراسىنداعى ازعىندىق پەن زورلىق ءىس-ارەكەتتەرى وسىدان بەس جىل بۇرىن 110 بولسا، 2015 -جىلدىڭ 10 ايىندا 700 گە جۋىق وسىنداي قىلمىس تىركەلىپتى. بۇل الەۋمەتتىك جەلىدە جىنىستىق قاتىناس، زورلىق سەكىلدى قىلمىستاردى اشىق ناسيحاتتاۋ، ازعىندىققا ۇندەۋ، سول ارقىلى رۋحاني ازعىرۋعا يتەرمەلەۋدىڭ اسەرىنەن دە بولۋى مۇمكىن. جاستاردىڭ ءتۇرلى اعىمنىڭ جەتەگىنە كەتۋىنە دە الەۋمەتتىك جەلىنىڭ ىقپالى بار ەكەنى بارشامىزعا ءمالىم. وسىنىڭ ءوزى الەۋمەتتىك جەلىنىڭ جۇمىسىن رەتتەۋ قاجەتتىلىگىن كورسەتەدى. بۇل بولاشاعىمىزعا، قاۋىپسىزدىگىمىزگە تىكەلەي بايلانىستى. سوندىقتان دا الەۋمەتتىك جەلىدەگى وسى كەلەڭسىزدىكتىڭ قوعامعا زيانىن زەرتتەۋ ءۇشىن ارنايى كوميسسيا قۇرىلسا يگى»، - دەدى دەپۋتات الماس تۇرتايەۆ.

اۆتور: قانات مامەتقازى ۇلى