شەتەلدىكتەر الماتى اۋەجايىندا تاكسي جۇرگىزۋشىلەرى ادامنىڭ مازاسىن الاتىندىعىنا شاعىمدانۋدا
بۇل تۋرالى بۇگىن استانادا اۋەجاي ماسەلەلەرىنە ارنالعان ياتا كونفەرەنسياسىندا الماتى قالاسى تۋريزم باسقارماسى باسشىسىنىڭ مىندەتىن اتقارۋشى تيمۋر دۇيسەنعاليەۆ ءمالىم ەتتى.
«قازاقستانعا ۇشىپ كەلەتىن ءاربىر ەكىنشى شەتەلدىك تاكسيستەردىڭ ادامنىڭ مازاسىن الۋ كەرى اسەر تۋدىراتىنىن العا تارتۋدا. وسىعان بايلانىستى بۇل ۇدەرىستى وركەنيەتتى ارناعا كەلتىرۋ ءۇشىن اۋەجاي باسشىلىعىمەن، الماتى ىشكى ىستەر دەپارتامەنتىمەن بىرلەسە قانداي دا ءبىر كەشەندى شەشىم قابىلدانۋى ءتيىس»، - دەدى ول.
سونىمەن قاتار اكىمدىكتەگىلەر اۋەجايدان تىكەلەي شىعاتىن شاتتل-باستاردىڭ (ارنايى اۆتوبۋستار - رەد.) جوقتىعىن اتاپ ءوتتى.
«كەز كەلگەن شەتەلدىك تۋريست اۆتوبۋستاردىڭ بىرنەشە تۇراعى بولادى دەپ پايىمدايدى، ياعني ولار بۇل اۆتوبۋستار ارقىلى بىرنەشە باعداردى تاڭداۋ مۇمكىندىگىنە يە بولعىسى كەلەدى. بۇل تۇرعىدا كۇردەلى جۇمىستاردى اتقارۋ قاجەتىلىك ەتەدى، ياعني قوناق ۇيلەرگە جۇرەتىن وسى باعدارلاردى قاراستىرۋ شارالارى قامتىلۋى كەرەك. وسى جۇمىستاردىڭ بارلىعىن مەملەكەتتىك- جەكە سەرىكتەستىك نەگىزىندە ىسكە اسىرىپ، ءبىزدىڭ بەس جۇلدىزدى قوناق ۇيلەر مەن نارىقتاعى بارلىق قاتىسۋشىلاردى تارتۋ كەرەك»، - دەدى ول.
وسى ورايدا الماتى اۋەجايى ەلىمىزدەگى نەگىزگىلەردىڭ ءبىرى ەكەنىن، قازاقستانعا ساپارلايتىن ءاربىر بەسىنشى تۋريست ءبىرىنشى كەزەكتە الماتىعا ۇشىپ كەلەتىنىن اتاپ ءوتتى.
اۆتور: رۋسلان عابباسوۆ
