احمەتوۆ ءىسى بويىنشا كۋاگەر قاراعاندى يندۋستريالدىق ساياباق نىساندارىن سالۋ كەزىندەگى بۇزۋشىلىقتار تۋرالى ايتتى

قاراعاندى. قازاقپارات - قاراعاندى وبلىستىق سوتىندا سەرىك احمەتوۆ پەن باسقا دا جوعارى لاۋازىمدى شەنەۋنىكتەردىڭ قىلمىستىق ءىسى بويىنشا كۋاگەرلەردىڭ تىڭداۋى جالعاسۋدا. كۋاگەر رەتىندە قاراعاندى يندۋستريالدىق ساياباعىنىڭ ينجەنەر-سمەتاشىسى ەلەنا گريازنوۆا ءسوز سويلەدى.

ە. گريازنوۆا قاراعاندى يندۋستريالدىق ساياباعى اۋماعىنداعى ينفراقۇرىلىمدىق نىسانداردى سالۋ بارىسىنداعى اقشا جىمقىرۋ ەپيزودى جايىندا ايتتى.

«باستاپقىدا شارۋاشىلىق تۇرمىستىق اعىنداردى تازالاۋ ستانساسى قۇرىلىسىن 2010-جىلى جازدا وڭ قورىتىندى العان، مەملەكەتتىك ساراپتامادان وتكەن «ساۋلەت» ج ش س ازىرلەگەن جوبالاۋ-سمەتالىق قۇجاتتاما بويىنشا جۇرگىزۋ جوسپارلانعان. كەيىن جۇمىس ۇردىسىندە تەحنولوگيا وزگەرتىلدى»، - دەدى ە. گريازنوۆا.

بۇدان بۇرىن سوت تالقىلاۋى بارىسىندا جابدىقتى اۋىستىرۋ ماسەلەسىن «سەنترستروي- كومپلەكت ن س» ج ش س مەردىگەرلىك ۇيىمى كوتەرگەنى بەلگىلى بولدى. مۇنى وسى ەپيزود بويىنشا ايىپتالۋشىلاردىڭ ءبىرى ءالجان اقمولدايەۆ ايتتى.

ەسكە سالساق، ءالجان اقمولدايەۆ سەرىك احمەتوۆتىڭ قامقورلىعىنىڭ ارقاسىندا ونىڭ كومپانياسى قاراعاندى يندۋستريالدىق ساياباعىندا ينفراقۇرىلىمدىق جوبالاردى سالۋعا ءتيىمدى قوسالقى مەردىگەر العانىن ايتقان.

«ماعان باستاپقىدا «كاسكاد» جوبالاۋ بيۋروسى، سوسىن باسقا فيرمالار ازىرلەگەن جاڭا جوباعا جوبالاۋ-سمەتالىق قۇجاتتاما تەكسەرۋگە بىرنەشە رەت ۇسىنىلدى. تەكسەرۋ ۇردىسىندە كوپتەگەن ماسەلەلەر، سايكەسسىزدىكتەر تۋىندادى، ونىڭ ىشىندە سمەتالىق نورماتيۆتىك بازا قولدانۋ، جابدىق قۇنىن قولدانۋعا قاتىستى (...). قىزمەتتىك جازبالاردا باسشىلىقتى جۇرگىزگەن جۇمىسىم جايلى، بىرنەشە رەت تەكسەرۋگە كەلگەن جوبالاۋ-سمەتالىق قۇجاتتاما قۇرامىنداعى انىقتالعان سايكەسسىزدىكتەر جايلى حاباردار ەتكەنمىن»، - دەپ حابارلادى ە. گريازنوۆا.