اقمولالىق سپورتشى قويان-قولتىق ۇرىستان الەم چەمپيونى اتاندى

كوكشەتاۋ. قازاقپارات - اقمولالىق سپورتشى ماكسيم ۋنراۋ قويان-قولتىق ۇرىستان الەم چەمپيونى اتاندى.

قاراعاندى قالاسىنداعى «جاستار» سپورت كەشەنىندە وتكەن دوداعا ەلىمىزدى قوسا العاندا رەسەي، ازەربايجان، قىرعىزستان، مولدوۆا، تاجىكستان، وزبەكستان جانە ۋكراينا ءتارىزدى 8 ەلدەن كەلگەن 550 دەن استام سپورتشى قاتىستى.

NOMAD MMA ارالاس قويان-قولتىق ۇرىس قازاقستاندىق نۇسقاسى بويىنشا ءوتتى. تارتىستى وتكەن جارىستا قازاقستان قۇراماسى جالپى كوماندالىق ەسەپتە ءبىرىنشى ورىن الدى.

ودان كەيىن رەسەي جانە وزبەكستان قۇرامالارى جايعاستى. ۇلتتىق قۇراما ساپىندا بولعان اقمولالىق ماكسيم ۋنراۋ 71 كەلىگە دەيىنگى سالماق بويىنشا سىنعا ءتۇسىپ، قارسىلاستارىن ايقىن باسىمدىقپەن جەڭدى. اقتىق ۇرىستا وزبەك سپورتشىسى جاراقاتىنا بايلانىستى جەرلەسىمىزبەن ايقاسۋدان باس تارتتى.

ەسكە سالا كەتسەك، ماكسيم ۋنراۋ اقمولا وبلىسى جارقايىڭ اۋدانىنىڭ تۋماسى قازاق كۇرەسى بويىنشا بىرنەشە دۇركىن اۋدان چەمپيونى بولعان. كەيىن قوستاناي قالاسىندا اسكەري سامبومەن اينالىسقان. ق ر قارۋلى كۇشتەرىنىڭ قاتارىندا حالىقارالىق جارىستارعا قاتىسىپ، توپ جارعان. جاتتىقتىرۋشىسى ۆلاديمير رۋسوۆ.

اۆتور: اسلان وسپانوۆ