تالدىقورعان- استانا جانە تالدىقورعان- الماتى باعىتتارى بويىنشا جاڭا اۋە رەيستەرى اشىلادى

استانا. قازاقپارات - Qazaq Air اۋە كومپانياسى بيىل قاراشا ايىندا «تالدىقورعان- استانا» جانە «تالدىقورعان- الماتى» باعىتتارى بويىنشا اۋە رەيستەرىن اشادى.

 بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا « Qazaq Air » كومپانياسى باسقارما ءتوراعاسىنىڭ قىزمەتىن اتقارۋشى بلەر پوللوك ءمالىم ەتتى.

«ءبىز قاراشا ايىنىڭ باسىندا الماتى مەن تالدىقورعان اراسىندا جانە تالدىقورعان مەن استانا قالالارىندا قاتىنايتىن جاڭا رەيستەردى اشاتىندىعىمىزدى جاريالاعىمىز كەلەدى. بىزگە ول جاڭالىقتى حابارلاۋ وتە قۋانىشتى»، - دەيدى ول.

«تالدىقورعان اۋەجايىنا اۋديتپەن بىرگە ءبىزدىڭ كومپانيا وكىلدەرى دە باردى. جەرگىلىكتى باسشىلىق قىرۋار جۇمىستار اتقارعان. ۇشۋ جانە قونۋ جولدارى، پەررون تولىعىمەن جاڭارتىلعان. اۋەجايدا بارلىق ارنايى تەحنيكالار اۋىستىرىلدى. اۋە ناۆيگاتسيالىق جابدىقتار جاڭادان ساتىپ الىنىپتى. تالدىقورعان اۋەجايى قازىرگى زامانعى اۋە كەمەلەرىن قابىلداۋعا، جولاۋشىلارعا ساپالى قىزمەت كورسەتۋگە تولىعىمەن دايىن»، - دەپ اتاپ ءوتتى  Qazaq Air كومپانياسىنىڭ كوممەرتسيالىق ديرەكتورى ادەل داۋلەتبەك.

 ايتا كەتەيىك، Qazaq Air كومپانياسى الماتى - استانا، الماتى - پاۆلودار، الماتى - شىمكەنت، الماتى - قوستاناي، شىمكەنت - پاۆلودار، شىمكەنت - اقتوبە، اقتوبە - قوستاناي، اقتوبە - اتىراۋ باعىتىندا رەيستەر اشتى.

 اۆتور: جاسۇلان جولدىبايەۆ