عارىشتا قاشىقتىقتى قالاي ولشەيدى؟
ال تابىلعان عارىش نىسانى جەردەن قانشا قاشىقتىقتا جاتقانىن قالاي انىقتايدى؟
جاقىن ايماقتا ورنالاسقان نىساندار ءۇشىن تريگونومەتريالىق پاراللاكس ءادىسى قولدانىلادى. ونىڭ قولدانىلۋ قۇرىلىمى وتە قاراپايىم. بارماقتارىڭىزدى اشىپ، الدىمەن ءبىر كوزىڭىزبەن، سوسىن ەكىنشى كوزىڭىزبەن قاراڭىز. اينالاداعى زاتتار ورنىنان قوزعالماعانىمەن، بارماقتارىڭىز ورنىن اۋىستىرادى.
جۇلدىزدار ءۇشىن دە تۋرا وسى ءتاسىل قولدانىلادى. بەلگىلى ءبىر عارىش نىسانىنىڭ تۇراقتى ورنىن انىقتاۋ ءۇشىن عالىمدار تەلەسكوپ كومەگىمەن التى اي بويى باقىلاۋ جۇمىستارىن جۇرگىزەدى. جەر جارتى جىلدا ءوز وربيتاسىنىڭ جارتىسىن اينالىپ ۇلگەرەتىنى بەلگىلى. دەمەك باستاپقىدا باقىلاۋعا الىنعان نىسانعا جەردەگى تەلەسكوپ ەكىنشى كوزبەن (نۇكتەدەن) قارايدى. سودان كەيىن ونىڭ سالىستىرمالى تۇردە وزگەرگەن تراەكتورياسىن انالوگيالىق ولشەۋ ءادىسى ارقىلى انىقتايدى. كەيىن ولشەم جارىق جىلدارىنا اۋدارىلادى.
بۇل تەك بىرنەشە مىڭ جارىق جىلىنا تەڭ قاشىقتاعى عارىش نىساندارىن ولشەۋگە ارنالعان، قوزعالاتىن نىسانداردىڭ قاشىقتىعىن انىقتاۋدا قولدانىلمايدى. الىس قاشىقتاعى نىسانداردىڭ ارالىعىن انىقتاۋ ءۇشىن وزگە دە استرونوميالىق ادىستەر ويلاپ تابىلعان.
massaget.kz
