قازاقستاندىق «تۇلپار- تالگو» پويىزىنىڭ جولاۋشىلارى ساپار بويى تەگىن كينو كورۋ مۇمكىندىگىنە يە بولدى
پورتال جولاۋشىلارعا الۋان جانرداعى فيلمدەردەن، ءارتۇرلى ويىنداردان تاعى باسقا دا قىزمەتتەردەن تۇراتىن مەدياتەكاعا قوسىلۋعا مۇمكىندىك بەرەدى.
وندا وتاندىق جانە الەمدىك كينوفيلمدەر مەن مۋلتفيلمدەردىڭ اۋقىمدى توپتاماسى جيناقتالعان جانە ولار مۇمكىندىگىنشە جاڭا ونىمدەرمەن جاڭعىرتىلىپ وتىرادى. بارلىق مەدياكونتەنتتى جوعارى ساپادا تاماشالاۋعا بولادى.
سونداي- اق، جولاۋشىلار پورتال ارقىلى پويىزداردىڭ ءجۇرۋ كەستەسىمەن تانىسىپ، قاجەتتى قالاداعى قوناقۇي نەمەسە تاكسي باعاسىن انىقتاپ، ءتۇرلى جاڭالىقتاردى وقىپ، سەرۆيس جانە قىزمەت كورسەتۋ ساپاسىنا قاتىستى ءوز پىكىرى مەن وي- ۇسىنىستارىن جازىپ قالدىرا الادى.
مۋلتيمەديالىق پورتالعا قوسىلۋ «گراند»، «بيزنەس» جانە «تۋريست» ۆاگوندارىنىڭ بارلىق جولاۋشىلارى ءۇشىن تەگىن. «گراند» پەن «بيزنەس» جولاۋشىلارى ۆيدەوتەكانى تولىق تەگىن كورسە، «تۋريست» ۆاگونىنىڭ جولاۋشىلارى تەك فيلمدەردى عانا قالاۋىنشا قوسىمشا اقى تولەپ تاماشالاي الادى.
وسى جىلدىڭ اياعىنا دەيىن بۇل قىزمەت «تۇلپار- تالگو» پويىزىنىڭ بارلىق 12 باعىتىنا ەنگىزىلمەك.
سونىمەن قاتار، جۋىردا «تۇلپار- تالگو» پويىزدارىمەن پوشتالىق كوررەسپوندەنسيالاردى جەدەل تاسىمالداۋ قىزمەتى («قازپوشتا» اق بىرگە) دە ىسكە قوسىلماقشى.
قازىردىڭ وزىندە استانا جانە الماتى-2 ۆوكزالدارىندا ورنالاسقان «قازپوشتا» نۇكتەلەرىندە سالماعى 3 ك گ دەيىنگى سالەمدەمەلەر قابىلدانا باستادى. ءسىزدىڭ سالەمدەمەڭىز ەندى تاۋلىككە جەتپەيتىن ۋاقىتتا پويىزبەن دىتتەگەن جەرىنە جەتكىزىلمەك.
جىلدىڭ سوڭىنا دەيىن بۇل قىزمەت وبلىس ورتالىقتارىن تۇگەلدەي دەرلىك قامتيتىن بولادى، دەپ حابارلايدى «جولاۋشىلار تاسىمالى» اق باسپا ءسوز قىزمەتى.
