تۇركيادا الەۋمەتتىك جەلى پايدالانۋشىلارى يسلامبەك قۋاتتى ۇلتتىق باتىرلارىنا تەڭەپ جاتىر
بۇل جەڭىس تۇركيا قۇراماسىنا دا قوسىمشا ۇپاي سىيلاپ، ولار «ەۋروپا چەمپيوناتى-2016» دوداسىنىڭ پلەي-وفف كەزەڭىنە جولداما العان بولاتىن.
ءوز كەزەگىندە تۇركيا قۇراماسى ىرىكتەۋ تۋرنيرىنىڭ سوڭعى ويىنىندا يسلانديا قۇراماسىن 1:0 ەسەبىمەن جەڭىپ، ۇزدىك ءۇش كوماندانىڭ سوڭعىسى رەتىندە (يسلانديا مەن چەحيادان كەيىن) ەۋروپا چەمپيوناتىندا ويناۋ قۇقىعىن العان-دى. ولار «ا» توبىندا 18 ۇپاي ولجالاعان بولاتىن.
بۇل ەلدىڭ قۇراماسى ءوز تاريحىندا ءتورتىنشى مارتە ەۋروپا چەمپيوناتىنىڭ فينالدىق كەزەڭىنە جولداما الىپ وتىر، بۇعان دەيىن 1996, 2000 جانە 2008-جىلدارى ءوز توبىنان شىققان ەدى.
جانكۇيەرلەر ءوز ەلىنىڭ قۇراماسىنىڭ فينالدىق كەزەڭگە شىعۋىنا سەبەپكەر بولعان يسلامبەك قۋاتقا شەكسىز ريزا بولعانى سونشالىق، وعان «تۇركيانىڭ ۇلتتىق باتىرى» اتاعىن بەرۋ تۋرالى ۇسىنىستار بىلدىرگەن. ال الەۋمەتتىك جەلى پايدالانۋشىلارى سەزىمگە تولى ريزاشىلىقتارىن جولداعان.
يسلامبەك قۋاتتىڭ بۇل گولى ونى تۇركيادا تانىمال ەتىپ جىبەردى. تەك «گۋگل» ىزدەۋشى جۇيەسىندە ونىڭ ەسىمى 1 ميلليون 200 مىڭ رەت تەرىلگەن.
بۇل ەلدە دەپۋتاتتار دا ۇلتتىق قۇرامانىڭ جانكۇيەرلەرى بولىپ تابىلادى. وسى ورايدا تۇركيا پارلامەنتىنىڭ دەپۋتاتتارى العىس ءبىلدىرۋدى ءجون دەپ تاپقان. سول سەبەپپەن قازىرگى بيلەۋشى دامۋ جانە ادىلدىك پارتياسىنىڭ دەپۋتاتى ماحمۋت ماللى تۇركياداعى قازاقستان ەلشىلىگىنە ارنايى بارىپ، ەلشى جانسەيىت تۇيمەبايەۆپەن كەزدەستى.
ەلشىلىك ارقىلى دەپۋتات يسلامبەك قۋاتقا العىس حات جانە «بەشيكتاش» كومانداسىنىڭ فورماسىن ەستەلىك رەتىندە جولدادى. بۇل سىيلىق قازاقستاندىق فۋتبولشى ءۇشىن قايتالانباس قۇرمەت بولىپ سانالادى، سەبەبى ول ءوزىنىڭ سۇحباتتارىنىڭ بىرىندە سۇيىكتى كوماندالارىنىڭ ءبىرى رەتىندە تۇرىكتىڭ ءدال وسى «بەشيكتاش» كومانداسىن اتاپ وتكەن.
