الماتى مەتروسىندا الەمدىك الەۋمەتتىك جارناما كورمەسى اشىلدى

الماتى. قازاقپارات - الماتى مەتروسىنىڭ «بايقوڭىر» بەكەتىندە الەمدىك الەۋمەتتىك جارناما كورمەسى اشىلدى.

«باۋىرجان» قايىرىمدىلىق قورى بۇل شارانى قازىر قالادا ءوتىپ جاتقان «Make It Clear!» الەۋمەتتىك جارناما بايقاۋى اياسىندا ۇيىمداستىردى.

وندا نەگىزىنەن جول قاۋىپسىزدىگى ەرەجەسى، ەكولوگيا، ماسكۇنەمدىك، تەمەكى قۇمارلىق سەكىلدى الەۋمەتتىك ماسەلەلەر كوتەرىلگەن.

ۇيىمداستىرۋشىلاردىڭ ايتۋىنشا، الەۋمەتتىك جارنامانىڭ باستى قاعيداسى - ادام ءومىرىن جاقسارتۋ.

«ءبىز وسىنداي الەۋمەتتىك جارنامالار، كەيدە ءتىپتى جان تۇرشىكتىرەر كورىنىستەر ارقىلى ادامداردىڭ نازارىن قوعامدىق ماسەلەلەرگە اۋدارعىمىز كەلەدى. الەۋمەتتىك ماسەلەلەردى وسىنداي الەۋمەتتىك جارنامالار ارقىلى كوپشىلىككە جەتكىزۋ وڭاي ءارى ءتيىمدى. وسىلايشا ادامدار ءوز كوزىمەن كورگەن سوڭ، قوعامدىق سيپاتتاعى ماسەلەلەرگە، سولاردىڭ ىشىندە جول قاۋىپسىزدىگىنە، ەكولوگياعا جانە باسقا دا ماسەلەلەرگە ءجىتى كوڭىل اۋدارا باستايدى. وسىدان بارىپ ادامداردىڭ ءجۇرىس- تۇرىسى، مىنەز- قۇلقى جاقسى جاعىنا وزگەرۋى مۇمكىن، - دەدى كورمەنى ۇيىمداستىرۋشىلار.

بارلىعى كورمەگە شەت ەلدىك اۆتورلاردىڭ 60 پلاكاتى كورەرمەن نازارىنا ۇسىنىلدى.

مەترو جولاۋشىلارى بۇل جۇمىستاردى الداعى 30 -قازانعا دەيىن تاماشالاي الادى.

ايتا كەتەلىك، بۇعان دەيىن الماتىدا مۇنداي كورمە 2013 -جىلى ۇيىمداستىرىلعان بولاتىن.

اۆتور: جاپپاربەرگەن ايبوتا