قۇدايبەرگەنوۆ نازاربايەۆتىڭ ناعىز داعدارىس تۋرالى ايتقان ءسوزىن ءتۇسىندىردى
«نازاربايەۆتىڭ كەشەگى ايتقاندارىنان بىرنەشە پۋنكتتى بەلگىلەپ الۋعا بولادى. بۇرىن داعدارىس قىسقا مەرزىمدى دەگەن بولجام جاسالدى. سونىمەن قاتار، سالدەن كەيىن جاعدايدىڭ جاقساراتىنى جانە داعدارىسقا قارسى قىسقا مەرزىمدى شارالاردىڭ جەتكىلىكتى ەكەنى ايتىلدى. بۇعان دەيىنگى داعدارىسقا قارسى شارالاردىڭ بارلىعى قىسقا مەرزىمدى بولدى. مىنە، ناعىز داعدارىستىڭ كەلگەنى جانە ونىڭ ۇزاققا سوزىلاتىنى مالىمدەلدى. ول دەگەنىمىز داعدارىسقا قارسى ۇزاق مەرزىمدى شارالار قولعا الىنادى دەگەندى بىلدىرەدى»، - دەپ جاۋاپ بەردى جۋرناليستەردىڭ «ناعىز داعدارىس دەگەن نە» دەگەن سۇراعىنا ولجاس قۇدايبەرگەنوۆ.
ول سونىمەن قاتار، مەملەكەت باسشىسى قازاقستان پرەمەر- مينيسترىمەن كەزدەسۋى بارىسىندا ايتقان بيۋدجەت كىرىسىنىڭ كورسەتكىشتەرىنە نازار اۋداردى.
«بيۋدجەت كىرىسى شامامەن 40 پايىزعا تومەندەگەن، بۇل جەردەگى ماسەلە سالىق تۇسىمىندە. ءبىراق دەۆالۆاتسيا ەسەبىنەن ۇلتتىق قوردان 8 ميلليارد دوللار كولەمىندە جىلدىق ترانسفەرت بولدى. ءبىر رەتتىك ترانسفەرتتەر دە بار. ەندى دەۆالۆاتسيا 188 تەڭگەلىك باعام بويىنشا دەلىك، ءبىر جارىم تريلليون تەڭگە اۋدارىلسا، 277 تەڭگەلىك باعام بويىنشا 2,2-2,3 تريلليون تەڭگە اۋدارىلاتىن بولادى. سوندىقتان ۇلتتىق قور ترانسفەرتى قوسىمشا تەك دەۆالۆاتسيا ەسەبىنەن 700-800 ميلليارد تەڭگەگە ارتادى. سول سەبەپتى سالىق ءتۇسىمىنىڭ تومەندەۋىنە قاراماستان بيۋدجەت كىرىسىنىڭ جالپى كولەمى ساقتالادى. سوندىقتان بيۋدجەتتە ەشقانداي قىسقارتۋ بولمايدى. مەنىڭ تۇسىنۋىمشە اڭگىمە ءتيىمسىز شىعىندار جونىندە. ال جالپى العاندا، داعدارىس كەزىندە بيۋدجەت شىعىنىن قىسقارتۋ دۇرىس ەمەس، سەبەبى جەكە سەكتور دا شىعىندى قىسادى. وسىنداي ساتتەردە ۇكىمەت ۇلعايتۋى ءتيىس (شىعىندى - اۆت. )»، - دەدى قۇدايبەرگەنوۆ.
ماكروەكونوميكالىق زەرتتەۋلەر ينستيتۋتى باسشىسىنىڭ ايتۋىنشا، كەشەگى ايتىلعان سوزدەردەن كەيىن ونىڭ اقىرى نەگە اكەپ سوعاتىنى بەلگىسىز. «ول تۋرالى تىكەلەي ايتىلعان جوق. ءبىراق جالپى، بۇل دەۆالۆاتسيا ءتۇرلى سەكتورداعى باعانىڭ وسۋىنە الىپ كەلەدى، ازىرشە الەۋمەتتىك ماڭىزى بار تاۋارلاردىڭ باعاسى اسا قاتتى كوتەرىلگەن جوق. بۇل جاعدايدىڭ قاي كەزگە دەيىن ساقتالاتىنىن بىلمەيمىن. ول سۋبسيديا(جاردەم قاراجات؛ كومەكقارجى - رەد.) ەسەبىنەن عانا شىداپ تۇرۋى مۇمكىن. مەنىڭ ويىمشا، بيۋدجەتتە وسىمگە شىدايتىن مۇمكىندىك جەتكىلىكتى»، - دەدى قۇدايبەرگەنوۆ.
ال داعدارىستىڭ قاي كەزگە دەيىن جالعاسۋى مۇمكىن دەگەن سۇراققا ول مۇناي باعاسى تومەن بولسا ونىڭ دا جالعاسا بەرەتىنىن ايتتى.
ەسكە سالا كەتەيىك، كەشە، 19 -قازاندا ن. ءا. نازاربايەۆ اقوردادا ق ر پرەمەر-ءمينيسترى كارىم ءماسىموۆتى قابىلدادى. كەزدەسۋ بارىسىندا ەلباسى بيۋدجەتتىڭ تيىمدىلىگى از شىعىندارىن قىسقارتۋدى تاپسىردى. «كاسىپورىندار مەملەكەت قاراجاتپەن قامتاماسىز ەتەدى دەپ كۇتپەۋى ءتيىس. ولاي بولمايدى، ۇلتتىق قوردىڭ اقشاسىن جاڭا نىساندار قۇرىلىسىنا، سونداي-اق ناشار جۇمىس ىستەيتىن كاسىپورىنداردى قولداۋعا، سۋبسيديالاۋعا پايدالانۋعا تىيىم سالامىن. بۇل جاعدايدا قانداي ءوندىرىس ءتيىمدى، قايسىسى ءتيىمسىز جۇمىس ىستەيتىنى بىردەن كورىنەدى. سونداي- اق ءبىز بارىنشا ءتيىمدى مەنەدجمەنت تارتۋ ءۇشىن جەكەشەلەندىرۋ جۇرگىزەمىز»، - دەدى قازاقستان پرەزيدەنتى.
