سيىر ساۋداسىمەن اينالىسقانى ءۇشىن مۇسىلمان جىگىتىن ءولتىرىپ كەتتى
قازا تاپقان 21 جاسار نۋمان احتار ۋتتار- پرادەش شتاتىندا ءىرى قارا مالىن تاسىمالداۋمەن اينالىساتىن ەدى.
ءوزىنىڭ جۇك كولىگىمەن كەلە جاتقان ونى ساراحان اۋىلى ماڭىندا بادجرانگ دال دەپ اتالاتىن يندۋستىق ەكسترەميستتەر توبىنىڭ مۇشەلەرى ۇستاپ الىپ، اياۋسىز تەپكىلەگەن. وقيعا ورنىنا ءتارتىپ ساقشىلارى كەلىپ جەتەمىن دەگەنشە، العان سوققىلار اسەرىنەن 21 جاسار نۋمان احتار كوز جۇمعان. ول جانۇياسىنىڭ جالعىز اسىراۋشىسى بولعان ەدى.
الايدا، ءتارتىپ ساقشىلارى كۇدىكتىلەردىڭ ىزىنە ءتۇسىپ، قىلمىسكەرلەردى قۇرىقتاۋدىڭ ورنىنا نۋماننىڭ دوستارىنا «سيىر مالىنا قاتىگەزدىكپەن قارادى» دەگەن ايىپ تاعىپ، تۇتقىنعا العان.
ەستەرىڭىزگە سالا كەتەيىك، وسىدان ءبىر اپتا ۋاقىت بۇرىن ءدال وسى شتاتتىڭ تۇرىعىن 55 جاسار مۋحاممەد اقحلاق يندۋستار قولىنان قازا تاپقان بولاتىن. وشىىكەن يندۋستار وعان جاسىرىن تۇردە سيىر ەتىن جەدى دەگەن ايىپ تاعىپ، سول ءۇشىن جازالادىق دەپ جالتارعان ەدى. الايدا، كەيىننەن تەكسەرۋ ناتيجەسىندە بەلگىلى بولعانداي، اقحلاقتىڭ ۇيىندەگى ەت ەشكىنىكى بولىپ شىققان.
