الماتىدا شەنەۋنىكتەرگە ق ر مەملەكەتتىك قىزمەتىنىڭ جاڭا مودەلى ءتۇسىندىرىلدى
«بۇل شارا قالامىزداعى مەملەكەتتىك قىزمەتكەرلەرگە ارنالىپ وتىر. ماقسات - ولارعا قازىرگى تاڭدا پارلامەنت سەناتىنىڭ قاراۋىندا جاتقان «مەملەكەتتىك قىزمەت تۋرالى» جاڭا زاڭ جوباسىمەن جان- جاقتى تانىستىرۋ جانە ونىڭ ەرەكشەلىكتەرىن ءتۇسىندىرۋ. وعان كوپ وزگەرىستەر ەنگىزىلدى. مىسالى، ەندى اسكەر قاتارىنا شاقىرىلعان مەملەكەتتىك قىزمەتكەردىڭ جۇمىس ورنى ول قايتىپ كەلگەنشە ساقتالاتىن بولادى. ەگەر قازىرگى اعىمداعى زاڭدا 30 باپ بولاتىن بولسا، جاڭا جوبادا 72 باپ بار. ياعني، وزگەرىستەر كوپ»، - دەدى الماتى قالالىق تارتىپتىك كەڭەستىڭ ءتوراعاسى باقتيار كامالوۆ.
ول سونىمەن قاتار، جاڭا زاڭ ەنگىزىلگەن سوڭ مەملەكەتتىك اپپاراتتىڭ كاسىبي دەڭگەيىنىڭ جوعارىلايتىندىعىن جانە باسشىلىق قىزمەتتەردە لايىقتى ادامداردىڭ ىستەۋى كەرەكتىگىن كوزدەيتىن مەريتوكراتيا ۇدەرىسىنىڭ ءتيىمدى بولا تۇسەتىندىگىن جەتكىزدى.
«ءبىز سينگاپۋر، كانادا، اۆستريا سەكىلدى ەلدەردىڭ تاجىريبەلەرىن زەرتتەدىك. ءبىراق ءبىز وزىمىزگە قاجەتتىلەرىن عانا الىپ، ءوز باعىتىمىزبەن جۇرەتىن بولامىز»، - دەدى ب. كامالوۆ.
ەۋروپالىق وداق جوباسىنىڭ باس ساراپشىسى ماكسيميليان فودينگەر مەملەكەتتىك قىزمەتتى رەفورمالاۋ اياسىندا مەملەكەتتىك قىزمەتكەرلەردى ىرىكتەپ، باسشىلىق قىزمەتتەرگە تاعايىنداۋ بويىنشا حالىقارالىق تاجىريبەلەر جايىندا اڭگىمەلەدى.
ال سەميناردىڭ ەكىنشى سەسسياسىندا «ە- قىزمەت» اقپاراتتىق جۇيەسىن ەنگىزۋدىڭ قىر-سىرى جايلى ايتىلدى. بۇل جۇيە مەملەكەتتىك قىزمەتكەرلەر تۋرالى كادرلىق اقپاراتتاردى ونلاين رەجىمىندە تولىققاندى الۋعا جانە بايقاۋلىق ىرىكتەۋدىڭ اشىقتىعىن قامتاماسىز ەتۋگە مۇمكىندىك بەرەدى.
ايتا كەتەلىك، بۇگىنگى شاراعا قالاداعى اۋدان اكىمدەرى، جەرگىلىكتى اتقارۋشى ورگانداردىڭ جانە ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى، سونداي- اق، مەملەكەتتىك قىزمەتكەرلەردى قايتا دايارلاۋ جانە بىلىكتىلىگىن ارتتىرۋ وڭىرلىك ورتالىعىنىڭ وقىتۋشىلىق قۇرامى قاتىستى.
بۇل سەمينارعا ەۋرووداقتىڭ «رەفورما جانە قازاقستان ۇكىمەتىنىڭ مەملەكەتتىك قىزمەتىن جاڭعىرتۋ» جوباسى تاراپىنان قولداۋ كورسەتىلدى.
اۆتور: جاپپاربەرگەن ايبوتا
