اتى شۋلى سوت پروتسەسىنىڭ نەگىزگى فيگۋرانتتارىنىڭ ءبىرى س. احمەتوۆتىڭ ءىسى بويىنشا كۋاگەر رەتىندە جاۋاپ بەردى

قاراعاندى. قازاقپارات - قاراعاندى وبلىسىنىڭ سوتىندا سەرىك احمەتوۆ پەن باسقا دا جوعارى لاۋازىمدى شەنەۋنىكتەرگە قاتىستى قىلمىستىق ءىس بويىنشا كۋاگەرلەردى تىڭداۋ پروتسەسى جالعاسىپ جاتىر.

بۇگىنگى سوت وتىرىسىندا ءوزى دە ايىپتالۋشى بولىپ وتىرعان قازاقستان ونەركاسىپتىك كورپوراتسياسى باس ديرەكتورىنىڭ بۇرىنعى ورىنباسارى ءالجان اقمولدايەۆتان كۋاگەر رەتىندە جاۋاپ الىندى.

ءالجان اقمولدايەۆ سەرىك احمەتوۆتەن پارا الدى دەگەن بولجامدى ەپيزود بويىنشا سويلەدى.

تەرگەۋ نۇسقاسى بويىنشا، ولار (ءا. اقمولدايەۆ پەن س. احمەتوۆ) «مەتاللۋرگيا- مەتالل- وڭدەۋ» يندۋستريالىق پاركىندەگى تازالاۋ عيماراتى ءۇشىن قۇرىلعى ورناتۋعا ارنالعان ميللياردتان استام بيۋدجەتتىك تەڭگەنى جىمقىرۋ كەستەسىن ويلاپ تاپقان.

 «ناقتى قاي كۇنى ەكەنىن بىلمەيمىن، ءبىراق، 2011 - جىلدىڭ كوكتەمىندە، مەنىڭ ۇيالى تەلەفونىما سول كەزدە قاراعاندى وبلىسى اكىمىنىڭ قىزمەتىن اتقارعان احمەتوۆ سەرىك نىعمەت ۇلى حابارلاستى. وسى جەردە ناقتىلاي كەتسەم، مەن سەرىك نىعمەت ۇلىن شامامەن 2005 - جىلدان بەرى تانيمىن. ءبىز سەرىك احمەتوۆ «اتامەكەن» كاسىپكەرلەر وداعىنىڭ ءتوراعاسى بولعان كەزدە تانىسقانبىز، ءبىراق، بۇگىن ناقتى قانداي جاعدايدا تانىسقانىمىزدى ايتا المايمىن. ءسۇيتىپ، تانىسقان سوڭ، ءبىر- بىرىمىزگە بايلانىس تەلەفوندارىمىزدى بەردىك (.. .) . سودان كەيىن، سەرىك نىعمەت ۇلىمەن ارا- تۇرا رەسمي شارالاردا، ءبىرقاتار كونفەرەنسيالاردا، جينالىستاردا كەزدەسىپ تۇردىق، سونىمەن قاتار، 2006 -جىلى ول ۇيالى تەلەفونىما حابارلاسىپ، كەڭسەلەردى جالعا بەرۋ ماسەلەسى بويىنشا اقىل- كەڭەس سۇرادى. احمەتوۆتىڭ سودان كەيىن ماعان حابارلاسقانى ەسىمدە جوق» ، - دەيدى ءا. اقمولدايەۆ.

 ونىڭ ايتۋىنشا، 2009 -جىلى سەرىك احمەتوۆ مەملەكەتتىك تەكسەرىسپەن اقمولدايەۆ تانىستىرعان نىسانعا كەلەدى.

«سەرىك نىعمەت ۇلى مەنى تانىدى، مەن ءبىر- ەكى اۋىز سوزبەن نىساندا قانداي جۇمىس اتقاراتىنىمىز، جەلى بويىنشا كاسىبي جۇمىس ىستەيتىن بىرنەشە كومپانيامىز بار ەكەنىن ايتىپ بەردىم، سول جولعى كەزدەسۋىمىز دە وسىمەن اياقتالدى» ، - دەيدى ءا. اقمولدايەۆ.

ونىڭ ارى قارايعى اڭگىمەسىنە قاراساق، 2011 -جىلى سەرىك احمەتوۆ وعان تەلەفون شالىپ، استانا قالاسى اقبۇلاق شاعىن اۋدانىنداعى ءبىر مەكەن- جاي بويىنشا كەزدەسۋگە شاقىرعان. ول سول مەكەن- جايعا كەلىپ، ەكەۋى كەزدەسەدى.

 «ول كەزدە مەن بۇكىل قازاقستان بويىنشا مەردىگەرلەر نارىعىنا مونيتورينگ جۇرگىزەتىنمىن، بىزگە قىزىقتى بولادى دەگەن كولەمدەردى تەكسەرىپ وتىراتىنمىن (.. .) . شامامەن، 2011 -جىلى مەن «قازگەرقۇرىلىس» ج ش س قاراعاندى قالاسىنداعى «مەتاللۋرگيا- مەتالل- وڭدەۋ» يندۋستريالىق پاركى ينفراقۇرىلىمىنىڭ قۇرىلىسىن سالۋ ءۇشىن كونكۋرس جەڭىپ العانىن ءبىلدىم»، - دەيدى ءا. اقمولدايەۆ.

ءا. اقمولدايەۆتىڭ ايتۋىنشا، «قاز گەر قۇرىلىس» كومپانياسىمەن ول بۇرىننان قارىم- قاتىناس ورناتقان، سوندىقتان، ولار جوعارىدا ايتىلعان جۇمىستاردىڭ ءبىر بولىگىن سۋبمەردىگەر رەتىندە ورىنداۋ ءۇشىن اقمولدايەۆ مۇددەسىن تانىستىرىپ جۇرگەن كومپانيا جارايدى دەگەن ماسەلەنى تالقىلاعان، ءبىراق، ەشقانداي ناقتى كەلىسىم جاسالماعان.

 «ءبىرىنشى كەزدەسۋىمىزدىڭ بارىسىندا ينفراقۇرىلىم جۇمىستارىنىڭ قۇرىلىسىمەن اينالىساتىن كاسىبي كومپانيانىڭ مۇددەسىن تانىتىپ وتىرعاندىقتان، سەرىك نىعمەت ۇلى ماعان يندۋستريالىق پاركتىڭ ينفراقۇرىلىم قۇرىلىسىنىڭ جوباسىنا ەنگەن جۇمىستاردىڭ ءبىر بولىگىن سۋبمەردىگەر رەتىندە الۋدى ۇسىندى. مەن وعان بۇل نىسان تۋرالى جاقسى بىلەتىنىمدى جانە ول ماعان وتە قىزىق ەكەنىن ايتىپ، «جارايدى» دەپ جاۋاپ بەردىم. بۇل سوزىمە سەرىك نىعمەت ۇلى: «جاقسى، سەنىمەن كەيىنىرەك حابارلاسادى» دەپ جاۋاپ بەردى. ءبىراق، ناقتى كىم حابارلاساتىنىن ايتقان جوق، كەزدەسۋ وتە تەز اياقتالدى»، - دەيدى ءسوزىن جالعاستىرعان ءا. اقمولدايەۆ.

ونىڭ ارى قارايعى سوزىنە سەنسەك، ءبىراز ۋاقىت وتكەن سوڭ اقمولدايەۆقا دانيار ەسىمدى ادام حابارلاسىپ، سەرىك احمەتوۆتىڭ اتىنان حابارلاسىپ تۇرعانىن ايتادى دا ءا. اقمولدايەۆتى كەزدەسۋگە شاقىرادى. ەكەۋى استانا قالاسىندا ورنالاسقان «ديپلومات» قوناق ءۇيىنىڭ حوللىندا كەزدەسەدى. سول ۋاقىتتا اقمولدايەۆ دانياردى تانىماعان. ونىڭ ايتۋىنشا، دانيار شامامەن 25-27 جاستاعى، ورتا بويلى، ىقشام دەنەلى، ازيالىق تيپتەس ازامات رەتىندە كورىنگەن. ەرەكشە بەلگىلەرى رەتىندە دانياردىڭ قولىندا تەرى اۋرۋى بايقالعانىن ايتادى.

«كەيىن، ءبىراز ۋاقىت وتكەن سوڭ مەن دانيار سەرىك نىعمەت ۇلىنىڭ بالاسى ەكەنىن ءبىلدىم»، - دەيدى ءا. اقمولدايەۆ.

دانيار سەرىك احمەتوۆتىڭ ۇلى ەكەنىن قايدا بىلگەنىن ءا. اقمولدايەۆ بىلاي تۇسىندىرگەن: «دوسىمنىڭ بالاسىنىڭ بىرىككەن اراب امىرلىكتەرىندە وتكەن ۇيلەنۋ تويىندا دانياردى كورىپ قالدىم، ونى تانىعان سوڭ كىم ەكەنىن سۇرادىم. ماعان دانيار سەرىك احمەتوۆتىڭ ۇلى ەكەنىن ايتتى».

 «دانيارمەن ءبىرىنشى رەت كەزدەسكەندە يندۋستريالىق پاركتىڭ ينفراقۇرىلىمىنىڭ قۇرىلىسى جونىندەگى جوباعا كىرەتىن جۇمىستاردىڭ ءتىزىمىن كورسەتتى. تىزىمدە ەنەرگەتيكا نىساندارى، جول قۇرىلىسى، اكىمشىلىك عيماراتتىڭ، ءورت ءسوندىرۋ دەپوسىنىڭ، تازالاۋ عيماراتىنىڭ، سۋ قۇبىرلار جەلىسى مەن كارىز جەلىسىنىڭ قۇرىلىسى جانە باسقا دا قۇرىلىس جۇمىستارىنىڭ ءتىزىمى بار بولدى. ياعني، جالپى سوماسى شامامەن 15-16 ميلليارد تەڭگە بولاتىن جۇمىستاردىڭ بىرنەشە بەتتىك ءتىزىمىن كورسەتتى. جانە ماعان سۋب مەردىگەر رەتىندە قىزىقتى بولاتىن جۇمىستاردى ءتۇرتىپ بەرىڭىز دەپ ۇسىندى.

نىسان تانىس بولعان سوڭ مەن بىردەن شامامەن 5 ميلليارد تەڭگە سوماداعى بىرنەشە جۇمىستى بەلگىلەپ بەردىم. وسىمەن كەزدەسۋىمىز اياقتالدى. ءبىرقاتار ۋاقىت وتكەن سوڭ دانيار قايتا تەلەفون سوعىپ، ەكىنشى رەت كەزدەستىك. ەكىنشى كەزدەسۋ بارىسىندا ول ماسەلە پىسىقتالعانىن جانە مەن مۇددەسىن تانىستىرىپ جۇرگەن كومپانيا مەن «قازگەر قۇرىلىس» كومپانياسى تاراپىنان ءوزىم تىركەپ بەرگەن جۇمىستاردىڭ سۋب مەردىگەرى رەتىندە كەىسىمشارت جاسالاتىنىن، كەلىسىمشارت باس مەردىگەردە كىدىرمەي، تولىق قۇنى بويىنشا جاسالاتىنىن ايتتى. جانە بۇل ماسەلەنى شەشۋ ءۇشىن ونىڭ مۇددەسىن انىقتاپ الۋ كەرەكتىگىن، ياعني، مەردىگەرلىكتىڭ سوماسىنان كەم دەگەندە 10 پايىزدى ونىڭ قولىنا بەرۋ كەرەكتىگىن ايتتى. ماعان ۋاقىت بەرىپ، ويلانىپ، قانداي شارتتا كەلىسەتىنىمدى ايتۋدى سۇرادى»، - دەيدى ءا. اقمولدايەۆ.

ونىڭ ايتۋىنشا، وسىمەن ەكەۋىنىڭ كەزدەسۋى اياقتالعان. ءبىراز ۋاقىت وتكەن سوڭ اقمولدايەۆ ءتيىستى ەسەپ جۇرگىزىپ، ءىستىڭ تيىمدىلىگىن باعالاعان.

 «مەنىڭ ەسەبىم بويىنشا، جوبانى تولىق قۇنى بويىنشا جۇزەگە اسىرسا تولىق كولەمنىڭ 22 پايىزىنا دەيىن، ياعني، شامامەن 1 ميلليارد تەڭگەدەن ارتىق پايدا تابۋعا بولاتىنىن ءبىلدىم. دانيار ۇسىنعان تالاپتى ەسكەرە وتىرىپ، مەن كەلىسىمشارتتى الۋ ءۇشىن سىياقى رەتىندە 600 ميلليون تەڭگە بەرۋدى ۇسىندىم. «ديپلومات» قوناق ۇيىندە وتكەن كەلەسى كەزدەسۋىمىزدە مەن وسى سومانى ايتتىم. ول بۇل سوماعا كەلىستى. ءبىراز ۋاقىت وتكەن سوڭ دانيار تەلەفون شالىپ، «ماسەلە شەشىلدى، «قازگەر قۇرىلىس» - پەن كەزدەسىپ، نەگىزگى كەلىسىمشارتپەن اينالىسا بەرسەڭ بولادى» دەگەندى ايتتى»، - دەيدى ءا. اقمولدايەۆ.

سودان كەيىن ءا. اقمولدايەۆ «قازگەر قۇرىلىس» ج ش س- نىڭ باسشىلىعىمەن كەزدەسىپ، سۋب مەردىگەر رەتىندە كەلىسىمشارت جاساۋ بويىنشا كەلىسىم العان.

اۆتور: كەنجەكەي توقتامۇرات قىزى